Shan State (Northern), Naungcho khuapi ah Sik Mawtaw 3 tawh galmai nawk SAC galkapte leh Ta’ang galkap (TNLA) belpawlte nasiatak kikap uh a, Thautang dal Mawtaw 1 matsak banah TNLA thugenpi Lt. Col. Tha Aih Kyaw in genkhia hi. Tuni November 9, 2023 ni zingsang tungin Shan State, Naung Cho khuapi ah kikapna nasiatak omin, TNLA pawlte in SAC galkapte’ zat Sik Mawtawpi 1, suhkhiatsak uh hi.
” Naung Cho township ah TNLA leh Mandalay-PDF kipawl in Sik Mawtaw 3 tawh galmai nawk a om Ukna buluh (SAC) te nasiatak kikapna ah Sik mawtaw 1 kisusia zo hi. 1029 Operation kipat ni akipan zanni November 8 ni ciang SAC tawh 50 vei val kikapna om a, SACin galvanleng tawh 36 vei, Thaupi tawh 90 vei val kikapna kinei hi. Kikapna omlohna mun Khuaneute zong SAC in Pound 500 gik bomb 2 vei khiat uh” ci-in Lt. Col. Tha Aih Kyaw in gen hi.
Abeisa November 7 ni in zong Namkham khuapi laizang a om Phungzi sang ah phualsat / abu SAC galkapte leh TNLA te nasiatak kikap uh a, SAC galkap leh Khuapi cing palik kigawm 17 te TNLA pawlte in hingmat uh cih kiza hi. Tua banah ” 1027 Operation” kipat akipan tuni November 9, ni ciangciang TNLA ukcipna sung ahi Naungcho, Lashio, Kutkai, Mogok, Muse, Theinni, Namkham, Namtu leh Mandon Tonwship sung a om SAC galphual 31 busim in lakhiazo ta uh ci hi.
“Tulaitak bel khuapi sungah TNLA galkapte adim in om uh hi. Khuapi sung teng dai khipkhep in om ta! A vak suk vakto zong om nawnlo. SAC khut nuai a om zumte zong kibusim mang khin ta in, bang mahmah om nawnlo. Nitak lamin SAC te’n Drone tawh hong kap uh a, koi lam pan hong kap cih kitheilo hi” ci-in Namkham khuami khatin gen hi. Kikapna nasia lua ahih manin, Namkham khua mite honkhat China gam lam a om Shan khua kicihna ah galtai uh a, pawlkhatte Muse khuapi lamah galtai uh cih kiza hi.
Three Brotherhood Alliance ahi (TNLA,MNDAA,AA) leh belpawl pihte in bel Shan State leilu (Northern) sung teng October 27 ni akipan SAC galphual teng busim uh a, galphual vekpi 140 val lakhia khin ta bek tham loin, Sik mawtaw 8 banah Galvan a lom atang in sutkhia zo uh hi. Hih kikapna / kidonate’ sungah SAC lam pan Thaupi tawh a kapna hangin, naupangte akihel khuami 12 val si-in, 20 val liam cih kiza hi.
Hits: 10