Singapore Evangelical Baptist Church (SG-EBC) ah Honorary Pastor ahi Rev. Rtd. Maj. Stephen Khup Chin Pau, Sukte beh (Kum 90) in tuni November 9, 2023 ni-in a teenna Singapore pan a nasepsak Topa’ kiangah tawlnga ding leh thaman sang dingin, hong nusia cih kiza ahih manin, a nusiat azi atate, pawlpi mite leh gamsung gampua a om sanggam beh leh phungte tawh kibangin Tongsan Media Group pan dahpihna i pulak hi.
Rev. Rtd. Maj. Stephen Pau ii luang hawm pen Singapore ah pawlpi mi asuahna masa leh Siampi zaa (Ordination) ngahna ahi Judson Baptist Church, Singapore in innteek semin vuina nei ding uh a, ani leh hun dingte ahun zui-in kizasak toto lai ding cih kiza hi. A dah akap a it mahmah a zi leh a ta a tute akipan a pawlpi SG-EBC mimal khat kim tungah Khasiang tho in hehnepna bukim na tungsak ta hen!
Rev. Rtd. Maj. Stephen Khup Chin Pau, Sukte pen Zogam, Tedim khuapi huam Mualbem khuami hi a, a neu lai mahin Tedim khuapi ah khangkhia in, Tedim tualsuak taktak ahi uh hi. Rangoon University pan Engneering a zawh khit ciangin Duke University, Durham, NC, USA ah pilna sin beh toto in, Manglai (English) a siam mahmah in minthang khat hi lai hi. Amah bek hi loin, a sanggamte teng akipan a suan leh khakte khempeh dongin mipil, misiam in a minthang vive nam ahi hi.
Kawlgam ah a pilna tawh kizui-in, galkap alutin Major dinmun dong ngah to ziau bek tham loin, Mingalardone Zatopi zong amahmah hanciamna tawh kilam ci hi. Kawlgam sung minam tuamtuamte’ lak dongah mipil, misiam leh min leh zaa nei minthang khat ahi hi. Tuni Rev. Rtd. Maj. Stephen Khup Chin Pau in hong nusiatna hangin Zomite’ ading Aksipi khat a kia hita hi.
Dahpihna Lianpi tawh,
Tongsan Media Group Inc.
www.tongsan.org
Hits: 32