Sagaing Division, Homalin township, Aungzayjah khua-ah SAC galphual pen Kuki National Army (KNA) pawlin abeisa December 8, 2023 zingsang lam (08:30am) hun pawlin Kuki National Army (KNA) leh PDF pawlin busim uh a, December 10, 2023 ni zingsang (08:00am) hunin lakhiazo uh ci hi. Tua SAC galphual busimna ah SAC galkap honkhat si-in, 6 hing mat uh a, honpi khat taimang ci-in Kuki National Army – Burma (KNA) in genkhia hi.
Aungzaya khua pen Tamu leh Homalin kikal-ah om khuapi khat hi-in, SAC galkap pawlin nasia tak phualsatna mun thupi khat ahi hi. A si a liam tawh ki pawl kicianin gen khiatna om nai lo hi. “SAC khut nuai-ah nasem sim a ki-ummawh mi 6 kiman in, a si a liam zah bel kigencian thei nai lian lo hiphot. Tu’n zong SAC pawlin vanlam pan bomb tawh hong kap thapai lai uh” ci-in KNA-Burma thu genpite in gen uh hi.
SAC galkapte’ kipawlte pen India gam pansan Meitei minam thau tawi United National Liberation Front (UNLF), Shanni Nationalities Army (SNA) leh Pyusawhtee te hi uh a SAC galkapte tawh kopin Tamu khuapi huam leh Homalin khuapi huam a om PDF pawlte a hunhun in kap zel uh hi. Aungzayjah galphual luhna-ah Kuki National Army (KNA-Burma) pan kum 25 gual khat leh tualsung PDF pawl pan kum 22 gual PDF galkap khatin a nuntakna pia uh a 12 liam uh ci hi.
” Homalin khuapi huam Aungzayjah khua galkap phual No. (1) Military Area Command pawl leh tual sung PDF pawlte pen abeisa December 8, 2023 ni pan kipan December 10, 2023 ni ciang (ni thum) sung akikapna pan December 10 ni zingsang (08:00am) hunin SAC phualpi lakhiazo la zo ” ci-in National Unity Government, Ministry of Defense , People’s Defense Force phualpi pan tangkona nei hi. Aungzayjah galphual busim kipat ni December 8 ni nitak lamin SAC galkap pawl in Tone kyaw khua Christian biakinn 2 hal tum sakin, mipi tenna inn 18 zong hal sak uh hi. Inn pawl khat kang tum in, pawlkhat mei kang pai suak loin dai kik, ci-in khuami khat in gen hi.
December 8 ni pan kipanin SAC galkap pawlte ahi; SNA leh Pyusawhtee kipawl khawmte’ kidalna leh panmun a lakna munpi ahi Kalay-Tamu lamzinpi tung a om Pantar khuaneu pen KNA leh PDF pawlin a lak zawh nading hanciamsan laitak uh ci-in KNA-Burma thu genpi Francis in genbeh hi. Galvai hangin Kalay-Tamu lamzinpi leh Tamu-Homalin kikawmna lampite khualzin gamvak mipite¨’n zat nawnloh phot dingin, tualsung PDF pawlin theihsakna nei uh cih kiza hi.
Hits: 5