Zogam, Tedim khuap ah Ukna buluh (SAC) te leh PDF Zoland leh CNO pawlin May 26, 2024 zankim nai (10:00Pm) hun pawlin Leilum-Leitawhtan veng lam pansan in SAC te’n kap kipan uh a, May 27, Zingsang tung (04:30Am) hun pawl ciangin nasiatak kikap tuahna om ci hi. Zingsang nai (06:00Am) hun pawl ciangin SAC lamte’n Vanleng tawh bomb khiat kipanta a, Inn pawl khat kizangawp pah cih kiza hi.
Innkatna mun teng pen Tedim khuapi laizang Myoma Veng, Zolengthe Nai Tausangpi kim teng Mann Store (Pa Sing inn), Mya Twe Inn, Myat Education (Sia Piang inn) Inn 5 kim leh Lawibual veng Mingalar Hotel leh a kim apam teng kang masa in, nitak lam (5:00 PM) hun ciangciang Innkang kisimzo nawnlo dinmun ah tungta ci hi. Tuni nitak lam nai (6:00Pm) ciangciang kikapna Thauging tawlnga nailo cih kiza hi.
Hih kikapna-ah Ukna buluh (SAC)lam pawlin Thaupi leh Rocket namte limzat mahmah uh a, langnih a si aliam om bek tham loin, Khuasung mite zong a si aliam pawl khat om cih kiza himah leh Tongsan Media in thukician kikansan lai phot hi. Mipi galkap PDF Zolandte in (Ministry of Border Affairs) zumpi leh Police Station -Micro Tower munte lakhiazo bek tham loin, SAC galkap 16 si-in Police 9 hingmat uh ci hi. PDF Zoland lamte zong Salpha 1 si-in cih kiza hi.
Tedim khua mite ahih leh Saimual (Welcome Signboard) lamah kinawn khia banah pawl khatte Gungal khualui lam leh Kawlpi lam zuanin galtai uh a, a tawm pen 5000 kim taikhia ta dingin kigen hi. Ahi zongin mipite lauthawng lua loin, Inn nusia a taikhiat kullo banah mipite liamna baina, sihna manna leh inn leh lo supna baina a tawm thei pen dingin kikapna kidawm mahmah dingin PDF Zoland in mipite tungah zaksakna nei cih kiza hi.
Hih kidona ah PDF Zoland pan Tg. Suut Mung in gam leh minam suahtakna dingin a tuailai nuntakna piakhia cih kiza ahih manin, a nusiat nu le pa, sanggamte leh adiakdiak in naseppih khempeuh tawh kibangin Tongsan Media Group pan zahtakna leh pahtawina i piak kawmin, Dahna lianpi i pulak hi. Mipi galkap PDF Zoland leh a pawlte khempeuh i biak Topan hong kembit sak hen la, maban ah Gualzawhna tawh hong makaih sak lai ta hen!
Hits: 4