Chin State, Tedim Township, Taingen khua ah phualsat a om SAC galphualpi pen CDF-CDM Siyin leh CNA kipawlkhawm uh a, zanni January 12, 2024 nitak lam akipan tuni Janaury 13, 2024 sun hun ciang dong nasiatak kikapna ah PDF kipawlkhawm pawl pan Salai Tluang Tin Cheu (CDF-Hakha) leh Salai Pum Kai (Kum 18 ), CDF-KKG te in nuntakna piakhia uh a, 7 liam cih thu CDF CDM Siyin pawlin genkhia hi. Hih kidona ah mipi galkap pawlte CNA, CDF-CDM Siyin, CDF-KKG, CDF -Thantlang, CDF-Hakha, CDF-Zanniatram, PDA leh CDF-Hualngoram cih teng kipawlkhawm uh ci hi.
” Tulaitak ciangciang PDF lamte 2 si-in, 7 liam hi. Kikapna bel kikhawl nailo hiphot. SAC lamte 5 bek om lai uh hita. Tua hi in, Vanleng leh Thaupi tawh galhuh in hong kap ziahziah uh hi. Tutung petpet ah nungkin nawnlo ding hita ung. SAC galphual ngah khiat mateng nuai ngekngek ding hi ung” ci-in, CDF CDF-Siyin thunei khatin gen hi.
“Zanni January 12, nitak lam akipan kikapna kipan hi. Galphual bel a vekpi kilakhiazo lian nailo a, a lang ciang kilutzo ta suak ” ci-in Salai Hteet Ni in genkhia hi. Tuni zingsang (08:00am) kim pawlin SAC galkapte’n Tiangen khua vanleng tawh 2 vei bomb khiat uh a, sun lam ciangin Suahlim khua bomb khiat leuleu cih thu khuamite’n Tongsan Media tanute zasak hi.
SAC galkapte in zong Kalaymyo, Tai giat (8 miles), Kalay University huang sung pan Taingen khua pen Thaupi tawh 30 val vei kap ziahziah uh a, thau ging ngaih mahmah cih thu khuamiten gen uh hi. Abeisa December kha akipan Tedim township, Taingen khua mite khempeuh Inn leh lo nusia in Hiangzing khuaneu leh Kalaymyo khuapite ah galtai uh cih kiza hi.
Hits: 5