November 14, 2023 || Tongsan Media Group ||
Chin State (Zogam), Chin State, Falam township sung, Rih Khawdar khuapi a om Ukna buluh (SAC) galphualpi mun 2 pen November 13, 2023 ni-in CNF /A leh kipawlpih tengin susim in, lakhiazo ngawngaw uh cih thu CNF thugenpi Salai Hteet Ni in pulakkhia hi.
Hih Rih Khawdar SAC galphual lakna ah Chin National Army (CNF/CNA), CDF – Hualngoram, CDF- Thantlang, People Defense Army (PDF), CDF -Zanniatram (ဇန်ညှက်ရမ်) kipawlna 5 te kipawl khawm uh hi in, CNA pan 5, PDA pan 1, si-in, 10 val liam uh ci-in Salai Hteet Nyi in genbeh hi. Tua mah bangin, SAC lam pan zong atawm pen 5 si-in, Major 1 akihel galkap 7 te a galvan ciat uh tawh kipumpiak uh ci hi. Adang 30 val pen India gam Ciau gunpi gal kantan in taimang uh a, India thuneiten kem uh cih kiza hi.
Rihkhawdar kikapna / khuapi lakna pen November 12, ni akipan Chin galkap kipawl khawmte in nasiatak kap uh a, November 13, ni zingsang lamin Rihkhawdar khuapi mualtung a om SAC galphualpi lakhiazo uh hi. Tua banah No (2) Veeng sung a om (Ciau gun) mualdawn a om SAC galphual pen nitak lamin lakhiazo leuleu uh cih kiza hi.
Hih Rihkhawdar SAC galphualpi 2 pen India – Myanmar No. (2) sumlei sumzuak kizopna phualpi omna khuapi ahih manin, SAC ii sumlutna leh sumbawlna khaktan nopna bulpi tawh kibusim hipipen ci hi. Kikapna sungah SAC pawlin vanleng tawh gal huh in nasiatak kap ziahziah uh ahih manin, khuami 10 valin liamna ngah uh ci hi. Tua banah Rihkhawdar khuamite Landmine launa hang leh khuasung ah om ngam nawnlo uh ahih manin, India gam Mizoram state sungah galtai ziahziah uh ci hi.
Zanni November 13, ni Rihkhawdar khuapi lakna pan India gam lamah a taimang SAC galkap 43 te pen Champhai township, Hnahlan khua pan India galkapte in Helicopter tawh Manipur State, Moreh khuapi ah puak uh a, tua pan Tamu khuapi a om (SAC) zumpi ah puak suak uh cih kiza hi.
Tuni November 14, 2023 ni ciangin Chin galkap kipawl khawmte in Rihkhawdar khuapi pen lungkim huai takin kemcing / ukcip zo ta uh a, khuapi sung ah SACte gamtat / khuasatna mun kicite khempeuh encian in siangtho sak uh bek tham loin, India – Myanmar gamgi kizopna kongpi (Gate) ah kisuang SAC Dialkhai lakhia in, CNF / A Dialkhai (Flag) khai uh cih kiza hi.
Hits: 18