Chin State, Tonzang Township ah CNA leh SAC kidona hangin mipite galtai uh ahih manin, hih kikapna tawh kisai a manlang in akihawlna ding vaipuak / thunei makaite’ tungah khamna leh mawh sakna thu Zomi Innkuan kipawlna (ZIUSA) leh biakna kipawlnate’n thusuahna (Statement) khauhtak bawl uh hi.
Tua banah America gam sungah Zomi biakna kipawlna lian pen pawlpi 37 val kipawlna ahi Zomi Baptist Churches of America (ZBCA- USA) pan daihna leh thumanna (Peace and Justice Commitee) in zong hih galkidona ah khuamite’n haksatna leh launa a thuak banah a tul asim galtai uh ahihna hangin Mawhsakna thusuah (Statement) bawl bek tham loin, a man langin kilemna leh kitelsiamkikna a omna dingin thungetna nei uh ci-in May 17 ni-a thusuahna tungtawn in kiza hi.
Tua banah Zomi Innkuan USA,Inc. kipawlna in zong, abeisa May 2, 2024 ni akipan CNA thautawite in, amau mun leh mual (Area) kantan in Tedim gam leh Tonzang gam sung a om Zomite leh Thautawi (ZRA) te a do/ akapna hangin May 13, 2024 ni-in lungkimlohna leh mawhsakna thusuah (Statement) pulakkhia uh hi.
Abeisa kum 20 lai akipan Tedim gam leh Tonzang gamah CNA te’n khua hasaute thatin, mipite tungah a gamtat siatnate uh kithuk kiklo bek tham loin, tu-in khauhpai semsem uh hi. Tua manin kilemna adeih mipite in CNF’ te’ gamtatnate kideihlo in nasiatak nial uh hi. Zomi Innkuan USA in Zogam a om Zomite’ ading akisam bangin dinpih / panpih ding hi ung ci-in pulak uh cih kiza hi.
Hits: 3