September 6, 2023 || Tongsan Media Group ||
Zogam, Tedim gam huam Thalmual khuami Kalay Township Pyidawtha khu a teng Pa Khen Khan Nang (Late) leh Nu Ning Khan Dinte’ tanu Lia Do Deih Huai @ Huaiboih (Kum 30) pen Ukna buluh (SAC) galkapte’ sat gawpna hangin September 5, 2023 zan ni-in a liamna hang mah tawh Kawlpi zato khat pan hong nusia cih kiza hi.
Lia Huaiboih pen abeisa August 27, 2023 ni-in, a khua Pyidawtha pan a lawmnu khat tawh Kalaymyo pai uh a, Lam kalah Ukna buluh (SAC) galkapte’n thusit in vua / sat gawp uh a, abil sung pan sisan nangawn luang khia hi. Motorcycle, phone leh a sumbawmte sutkhia in, Lia Huaiboih bek khahkhia kik uh ci hi.
August 28, 2023 ni zingsang annek madeuh in Lia Huaiboih in a pumpi leh a lutang nasa lua ahih manin khua phawklo (sibup) suak ci hi. Innkuanpihte leh meltheihte in cihna ding a theihloh ciangun, Kalaymyo a om Shin Hong Clinic ah puak pah uh hih leh khua pawk nawn loin omcip suak ci hi. Siavuante’n khuak lam kisiatna om cih upmawhna tawh Mandalay or Yangon zatopi lam puak dingin sawl uh himah leh sum le paii haksatna hangin, kipuakpak theilo ci hi.
Tua bang teng tawh a lawmit pawl khatin Online Social Media tungtawn in panpihna / Huhna ngetsak uh a, mipihte’ itna leh deihsakna tawh huhna sum honkhat kingah khin ci hi. Tuateng mah tawh Mandalay lam zuan dingin Mawtaw tawh a paina ah Lampi pan hong nusia ci hi. A luang pen Pyidawtha ah kipua suakin September 5, nitak lam (3:00pm) hunin Hanmual ah kivui pah cih kiza hi.
Source: Facebook Social Media
Hits: 9