Ukraine, USA leh Europe tengin Ukraine gam mai lam ding tawh kisai kikuppihnop a neih khak leh Russia in zong kuppih ding a baihsa in om ung ci-in Russia President Vladimir Putin in December 19, 2023 ni-in genkhia hi. Ahi zongin Russia in bel amau gam leh minam ading hamphatna ding ngaihsut zek kul ding ci-in Putin in genbeh hi.
2022 kumin Ukraine gam sung ah kisawlkhia Russia galkapte pen Putin in kilemna om theihna dingin kamkum ding abaihsa in om ing ci-in a gengen sam hangin, a sepkhiat ma hong tung ding mai kum November kha sungah akibawl ding US Kumpi kiteelna a ngak hi ci-in, nitumna gam lam thuneiten gen uh hi.
” Russia galnei Ukraine gam leh Europe leh USA thuneite tawh kikup ding lunggulhna om leh kikupna ding hun kipia lua ding hi,. Ahi zongin ei leh ei phattuamna ding ciat bulphuh in kikup kul ve” ci-in Moscow khuapi galkap zumpi makaite tawh Meeting a nei laitak in Putin in genkhia hi. Russia in bel Europe gam tawh gal kineihloh ding geelna leh ngaihsutna nei vetlo ahihna thute genbeh hi.
Abeisa 1991 kum Soviet Union kikhenkhap lai in, leitang 17.5% (Percent) tang ding Ukraine te’ gam leh neihsa in leitungbup in kipsakna leh theihpihna akinei khinsa pen Russia in kisai lopi in a ukcip uh ahi hi. Russia in Crimean peninsula pen abeisa 2014 kumin lakhia / ukcip uh a, nikum in zong Ukrain te’ neihsa gam leh leitang mun 4 pen Russia gam dingin pulakkhia uh hi. Ukrain in amau gam sung pan Russia galkapte khat zong cian loin, hawl khiat mai mateng ka do suaksuak ding uh ci-in genkhia hi.
Hits: 4