A 8 veina Gambuppi Kikap nawnloh Thukimna (Nationwide Ceasefire Agreement – NCA) khawmpi pen October 15, 2023 ni-in Ukna buluh (SAC) makaihna tawh Nyipyitaw khuapi Myanmar Internationational Convention Center (MICC- II) ah ah kinei a, NCA sungah a lutsa / a thukim kipawlna (8) pan makaite pawl khat akihel om hangin, pawl khat kihel nuam nawnlo ci hi. Hih NCA Khawmpi ah Ukna buluh (SAC) makaipi Senior General Min Aung Hlaing in NCA sungah akipawl nailo Thautawi kipawlna dangte zong a lutna dingin cialna leh hanthotna nei ci hi.
Karen National Union/Karen National Liberation Army- Peace Council (KNU/KNLA-PC), Democratic Karen Buddhist Army (DKBA), Restoration Council of Shan State (RCSS), Pa-O National Liberation Army (PNLO), Arakan Liberation Party (ALP) leh Lahu Democratic Union (LDU) cih teng kihelthei uh a, Chin National Front (CNF) leh All Burma Students Democratic Front (ABSDF) te kahlo uh cih kiza hi.
Ahi zongin Karen National Union (KNU) pan makaipi lui General Padoh Saw Taw leh ABSDF makaipi Myo Winte pen tulaitak kipawlna makai thakte’ thukimna leh theihpihna tawh kihel / akah hi loin, NCA suaikaih masak hun lai akihelsa uh hihna tawh mimal minpua in akihel uh hi ci-in kipawlna makaiten pulakkhia uh hi,
KNU thugenpi ahi Padoh Saw Taw Ni in a genna ah, ” NCA ading lawp takin akihel hangin SAC in hih NCA thukimnate le gam le-minam vai kamkupnate awlmawh loin susia ahih manin NCA thukimna tawh kisai a bei (om nawnlo) hi” ci-in October 15 ni-in gen hi. Tua mah bangin ABSDF thuvanpi San Ni in zong agenna ah, “SAC te in ko zong hong zawn mah uh hi. A hih hangin NCA pen abei khin ta ahih manin kihel theihna ding thu om nawn lo hi” ci-in gen hi. Tua banah hih NCA thukimna pen U Thein Sein kumpi hun lai 2015 kumin mualtung mi thau tawi kipawlna 8 teng ahi; KNU, KNU/KNLA-PC, DKBA, CNF, PNLO, ABSDF, ALP leh RCSS te kihelin suai kaihna nei khawm uh hi.
2016 NLD kumpi hun ciangin Lahu Democratic Union (LDU), New Mon State Party (NMSP) kibehlapin suai kaihna nei kik uh a, NCA sungah akipawl khawm vekpi gawm 10 pha uh hi. 2021 February 1, ni -in SAC Galkap in thuneihna a sutkhiat khit ciangin, Karen National Union (KNU), Chin National Front (CNF) le All Burma Student’s Democratic Front in galkap ukna buluhna nialin SAC tawh kimuh khopna ah kihel nuam nawn lo uh hi.
Abeisa hun sawtpi akipan mipite a kaplum den ahi ukna buluh (SAC) in galkilemna khawmpi a neih zel hangin, up leh muan theih ding hilo ci-in ASEAN kipawl gamte ah Parliamentarians kipawlkhopna (APHR) te in October 17, 2023 ni-in pulakkhia hi.
Hits: 5