Chin State sungah Revolution thau tawi kipawlna khat ahi Mara Defense Force (MDF/MTC) leh CDF-Mara pawl nih om uh a, thu tuamtuam hangin kitelkhialhna nei uh hi. Tua kitelkholna leh kilemlohna pan kilem kikna ding leh mapankhop theihna dingin biakna makaite’ makaihna tawh thukimna nei thei uh cih kiza hi.
Hih MDF/MTC leh CDF-Mara pan langnih makaite pen Mizogam, Saiha District, Zawngleng Khua-ah May 22-24 ni thum sung kimukhawm uh a, tua laiah Mara Evangelical Church pastor te leh upate’n holimpihna leh leptuahna tawh mapankhop kik theihna ding thukimna nei uh hi, ci-in MDF/MTC information Secretary in pulakkhia hi.
Tua kilemkikna leh Kipawlkhop theihna dingin Commitee phuanin kizopna neihto semsem ding hi. A tawm pen kha 2, 3 khawng hun pia-in sep kul ding hi. Na khempeuh ah kipawlna dingin Mara gamhuam ah ki-ukna khat, galkap kipawlna khat bek om ding, cih thu tawh thukimna nei uh ci hi. Tua thukimna-ah pawl nih pan tangmi 5 ta, biakna Siate, khuapi pan mipi 5 ta kiteelkhia in, Kipawlkikna Committee phuan khia uh a, kalsuanzia ding dan (Policy) kician neih dingin, hih Commitee in Mara mipi kimuhkhopna samin kiteelna neih ding thukimna nei uh ci hi.
Tua kiiteel khit ni 14 sungin pawl nih pan akiman a galkapte tuak uh khah khia tuak ding cih thute kiihel hi. Hih Mara minamte’ sungah a phuat khiat uh MDF leh CDF-Mara te pen pawl nih thu kituak lohna hangin tukum sung bekbek in a tawm pen 10 vei val kido / kikap uh a, supna tampi piang hi. Mara minam khat leh khat kikal ah sisan naisan luanna leh sihna manna tampi om ci hi. Hih kilemkikna a om theihna dingin Mara Evangelical Church pan makaite’n Peace Commission phuan khia in kilemna ding a leptuahna tawh hih bangin kilemkikna leh mapankhop theihna a piang thei ahi hi.
Athu bulpi pen-ah Mara Evangelical zum pan thautawi pawl nihte kilem lo ci-in MBA, BAM, UPC pawlpite tungah huhna ngen uh a, Peace Commission te in 4, 5 vei bang kimuhkhopna a neih khit uh ciangin lawhcinna kingah ahi hi, ci-in MDF/MTC information Secretary in genbeh hi. Tu laitakin CDF-Mara pen Chinland Council-ah a kihel banah MDF pen Chin Brothers-ah kihel uh cih kiza hi.
Hits: 2