Thaninthari Division, Bohpin Township sung Thaninthari-Bohpin-Kohtaung lampi a om Ukna buluh (SAC)te’ Point 1020 Camp pen kilazo ta hi, ci-in KNLA leh PDF kipawlkhawm Black Cobra Column pawlin May 12, 2024 ni-in pulakkhia uh hi. KNLA leh PDF kipawl khawmte’n ahih leh abeisa April 30, 2024 ni pan kipan hih SAC Point 1020 Camp a do uh hi-in, May 11, 2024 ni zingsang lamin lakhiazo ngawngaw uh hi.
Tua Point 1020 Camp ah Bohpin khuapi စကခ(၁၃) khutnuai a om ခမရ (၅၅၅)၊ ခမရ(၅၅၉) leh ခမရ(၄၃၂) cihte kipawlin a pang khawm uh hi a, tua a Camp a kepbit zawhna dingin van lam panin zong nasiatak sual ziahziah uh hi mah leh, akido zawh May 12, 2024 ni-in, SAC galkapte’n amau Camp taisan (nusia) uh cih hi. Amau taikhiat khit ciangin PDF kipawl khawmte in SAC te’ Camp etkikna uh a, galvan tuamtuam leh vanzat tampi mukhia / lakhia uh hi. Tua banah Camp huang sungah SAC galkap misiluang a kivuina leihawm zong mukhia uh ci hi.
“Lei hawm sung pan misi luang phazah kisuahkhia nai kei,” ci-in Black Cobra Column pan vaipuak nei khatin Media te’ tungah pulak hi. Camp pan a taikhia SAC galkapte pen PDF kipawlte in sul delh pah uh a, gal huh dingin a pai SAC galkapte tawh kikaptuahna nei kik pah uh hi, ci-in PDF pawl ahi Black Cobra Column te’n tangko khia uh hi. “Ko zong ka dal san laitak uh hi,” ci-in PDF pawl pan vaipuak nei khat in genbeh hi.
Mipi tampi paina lampi a khaktan SAC’ Point 1020 Camp pen mipi galkap (PDF) kipawlkhawmte’n lakhin uh a, gal huhin a pai SAC galkap leh Phyue Saw Htee te zong a kizon san laitak ahih manin Beik -Bohpin lampi tungah khualzin mipite kidop mahmah ding thum uh hi. Tua Bohpin township SAC’ Point 1020 Camp lakna-ah KNLA-PDF kipawlkhawm Black Cobra Column leh Beik Province People Defense Force Black Cobra Wings drone pawlte mapang khawm uh hi a, mipi galkap (PDF)te khat a khe liam ci hi.
Hits: 2