Chin State, Falam khuapi huam Kalay-Falam mawtaw lampi Var Gunlei kiangah phualsat a om ukna buluh (SAC) te in November 15 ni sun hun pawlin, a Camp uh nusia ta cih thu Chin National Defense Force (CNDF) thugenpi Salai Chin Ngai in genkhia hi.
“Falam khuapi a om SAC galkapte tawh kigawm ta uh! Mimal zong tam nawn kei. Zan hal November 13 ni CNA in Rih khawdar galphual lakhia uh a, Ko CNDF pawlin zong SAC phual khat lakhia khin hive ungin, Falam khua sung ka do kik ding uh lau hi’n teh“ ci-in Salai Chin Ngai in genkhia hi.
Var Gunlei / galphual pen Falam khuapi tawh tai 5 kigamla a, November 15 ni-in SAC galkap te’n nusia in taisan ta in, Falam khua sung a om Khah Lah Yah (268) tawh kigawm ta uh hi. Abeisa April 15, 2023 ni-in CNDF in Var SAC phualpi busim uh a, SAC galkapte 11 si-in 14 hing mat banah galvan tampi ngah khia uh hi.
Tua banah zanni November 15, 2023 ni zingsang lam in zong Rih Khawdar khuapi leh Falam khuapi kikal a om Tibual Camp zong CNDF pawlin busim in lakhiazo banah mei tawh haltum uh hi. Tua laiah SAC galkap honkhat si-in, galkap khempeuh phial in Camp nusia in taimang uh cih thu CNDF thugenpi Salai Chin Ngai in genbeh hi.
Hits: 5