Chin State leilu lam Myanmar-India gamgi neh a om Tonzang Khuapi a om Ukna buluh (SAC) te’ galphual pen Chin National Army (CNA) leh a pawlte in abeisa May 17 ni akipan do / kap ngekngek uh a, Khah Lah Yah (269th) Battalion Camp leh Police Station teng lakhiazo uh hi. Tua banah May 21, 2024 ni zingsang tungin a om lai (SAC) te’ Camp zong va luhkhia zo leuleu uh cih kiza hi.
“Tonzang khuapi sung a om lai SAC galkapte’ bukna mun khempeuh tuni May 21 zingsang tungin kilakhia siang bek tham loin, SAC galkapte misi 11 kimukhia in, a tamzaw taimang uh ci hi. A site lakah ZRA galkap Tuithang khuami Tg. Tuanglek zong kihel in, a luanghawm pen Tuithang khua ah kipua in, kivui ding ci hi. Chin kipawlkhawm lamte zong mi 3 si-in, 10 kim liam uh ci hi. Tua banah SAC te’ Thauneu lawng 50 kiim kingah beh cih thu CNA thugenpi Salai Hteet Ni in genkhia hi.
A taimang SAC galkapte kilimzon mahmah laitak a, khua sungah zong kikapna pawlkhat om lai ci hi. Kidona sungah SAC pawlin lel mahmah uh ahih manin, vanleng tawh galhuh ding puak beh ziahziah bek tham loin, India gam phualpi in a nei SAC tawh akipawl ZRA te’n zong nasiatak panpih uh ci-in Salai Hteet Ni in siang takin genkhia hi. SAC pawlin Galvanleng tawh tung lam pan nasiatak kap ziahziah uh ci hi.
“Hihte khempeuh kibuk kawm kawmin akisem ahih manin mun siansiah ding bel hamsa mahmah hi. SAC in zaang lam pan gal huhin hong pai zo nawn lo uh. Tua khit teh Tonzang khuapi pen Chin State leilu lam a om ahih manin, CNA leh a pawlte a honpi-in a tun vat ding upmawhna nei uh hi. Ahi zongin kido taktak ciangin, a lung uh kiat tuak mahmah,” ci-in Salai Thet Ni in hun tomno sungin Tonzang khuapi akiluah zawhna thu pulak khia hi.
“Tonzang khuapi pen galvai leh gamvai-ah nakpi thupi hi. Ukna buluh (SAC) leh ZRA pawlte a thahat kik lohna dingun nakpi tak hanciam tohtoh lai ding kisam hi,” ci-in CNA thugenpi Salai Hteet Ni in genkhia hi. Tulaitak in ahih leh Hakha, Thantlang Khuapite-zongah kidona om laitak hi in, Chin State mun dangte-ah bel kidona nasialua a omloh hun laitak ahi hi, ci-in Salai Thet Ni in genbeh hi. CNA makaih thautawi kipawlkhawmte in Chin State sungah SAC phualpi 17 val sang luah khin ta uh ci hi.
Tonzang khuapi kido/ kikapna hangin Khuazang buppi phial in galtai uh a, pawl khatte bang mah keng man loin taikhia uh ahih manin, zanpuan ding nangawn nei lo uh hi. Tua banah annek tuidawn leh zatui zaha zong tampi kisam mahmah cih thu galtaite khatin gen hi. SAC in vanleng tawh akapna hangin khuamite tai lah taikhia thei nawnlo in, Inn sung leh khua sungah a awkcip tampi om lai uh ci hi.
Hits: 6