Unau sanggam khat kidona tawh cik mah hunin Chinland kiphutzo ngeilo ding hi, ci-in ZRA-EC pan Director Pu Zo Thang in pulak hi. Tulaitak ZRA pen CNF/CNA leh a pawlpihte’n nakpitak hong dona hangin kinungkin hi mah leh, ZRA bei ngeilo ding hi. ” Ko mun, ko’ thuneihna mun uh ah thautawi-in ka om laitak un, CNA te’n tha khatin hong do uh ahih manin, a nungkik phot hi ung. Ahih hangin gamvai tawh kisai ka lungsim uh kikhel tuan lo hi. Amau in thuman lopi tawh hong dona uh pen nikhat ni ciangin, thumanlo tangthu suak ding hi. Mai lam-ah gamvai pen gamvai tawh, galvai pen galvai tawh sem le’ng hoih in teh! A kisai lopi-in ei le ei kikapna tawh phattuamna om het loin, supna baina leh sihna bek kingah hilel. Chinland phutna ding vai ko makai ding, a cih uh leh bel unau sungah kizopna hoih ngeilo ding hi” ci-in ZRA Makai Pu Zothang in gen hi.
2024 May 19 ni-in Chin State leilu lam Tonzang le Cikha khuapite CNA leh a pawlte’n lakhin bek tham loin, luah / ukcip ta uh a, tua township sung-a om ZRA phualte zong luahzo uh hi, ci-in Chin State sung-aa News te’n gen uh hi. Ahi zongin hih Tonzang leh Cikha khuapite pen CNA pawlte’n luah hi, cih tawh kisai thu kipsakna kician taktak om thei nailo cih kizakik zel hi. Chin State sungah ZRA-EC leh CNF/CNA te a hunhun in kidothei den uh hi. CNF makaih pawlte in kizopna lampi leh siahkaihna (Tax) vai tawh kisai suaktak vaipuak a neih theihna dingin ZRA a kido hi, ci-in CNF tawh a kinai khat in genkhia hi.
Chin state sungah thautawi khat le khat i kido lai teng a kilungtuak, a khangto Chinland suak thei ngeilo dinga, Chin minamte sungah kimuhdahna bek khang ding hi, ci-in ZRA-EC Director Pu Zo Thang in genbeh hi. Amah’n, ” CNA in ZRA makaite tawh kihotuahna ut hetlo in, hong neu-muh / simmawh bawl lua ahih manin, hih bang dinmun ciang a kitung ahi hi. Kimuh khop ding a ut het kei uh leh zong phone tawh hong contact le uh hoih pen hi ve’n. Tua hi lo a, hih bang danin kipai suaksuak lai leh unau sungah kimuhdahna khang semsem ding” ci-in Pu Zothang in gen hi.
ZRA pen Myanmar gam Chin State, Tonzang, Tedim Township; Sagaing Region-ah Kalay, Tamu Townships, Kabaw kim teng leh Myanmar-India gamgi kikal cihte-ah gam tang uh hi. CNF pen gambup kidona khawl ding thukimna (NCA)-ah suaikai Chin thautawi kipawlna hi aa, Thantlang Township phualpi hi-in Hakha, Tedim, Matupi cihte-ah zumkhen (Branch office) nei-in gamtang uh hi.
Hits: 7