Ukna buluh (SAC) kumpi in Myanmar gam pan gamdang ah nasem ding pasalte May 1, 2024 ni akipan phal nawnlo (khak tan) ta cih thu SAC kumpi Nasepna zumpi (Ministry of Labor) pan U Nyunt Win (Permanent secretary of Ministry of Labor) in pulakkhia hi. Koi gam ah, bang company nasem ding cihte kisai loin,pasal kici peuh mah kipaisaklo phot ding ci-in, U Nyunt Win in genbeh hi.
Abeisa April kha bei ciang thukimna laibawlna (MOU) tawh a pai ding pasal sazian omsate bel kihello / huam kha lo ding hi. Gamnih kumpi nasem mi zong pawlte (Intergovernmental Employment Agencies) te tungtawn a pai ding mi pawl khatte zong kihel khalo ding hi. May 1, 2024 ni akipan gamdang paina ding lai bawl / passport a bawl numeite bek pai thei ding hi. Pasal saziante khempeuh bel akisapna zui-in, kikhakcip phot suak hi” Bang hang kikhawl sak, bang hun ciang kikhawlsak ding cih kigencian theilo a, ahun zui-in tawmvei kikhaktan hiphot ci hi.
Yangon Region, Theigun Gyun Township a om gamdang nasem ding siauhna zumpi (Overseas Employment Agency) ah thunei khatin a genna ah Galkap lut ding cih thukhun akipulak khit akipan Vanlam leh lei lam pan lampi om bangin pasalte akizinkhiat ziahziahna hangin, Ukna buluh (SAC) in hih bangin khaktan uh hi dingin genkhia hi.
” SAC kumpi in khangnote galkap lut loh phamawh cih thukhun pulakkhia uh hiven. Tua thukhun a tangko ni akipan pasal / khangnote lampi om bangbang tawh zinkhia ziahziah uh ahih manin, SAC kumpi in ciangtan / khaktanna a bawl uh hih tuak hi.”
SAC makaipi Senior General Min Aung Hlaing in May 1, 2024 ni Leitungbup Nasepte Ni (May Day) ni thupuakna lai (Statement) sungah nasem khempeuh in gam ading a thupi mahmah thahat nasemte ahih manin, gamdang tung Myanmar gammi nasemte’ hamphatna (Right) te kihumbit sak / kithupit ngaihsut sak mahmah hi cih thu genkhia hi.
Hits: 8