August 12, 2023 || Tongsan Media Group ||
Chin State, Falam khuapi a om Ukna buluh (SAC) galkap Khah Lah Yah (268) Battalion te’n Chin galkap pang khawmte (Chin Alliance)te tawh akikap khit ciangin, SACten vanleng zangin Thaupi tawh khuaneute nasiatak kap uh a, numei leh naupang kigawm vekpi 10 val liam cih kiza hi. Tuni August 12, 2023 (Saturday) zingsang tung 01:00am -02:00am sung Falam khuapi a om ukna buluh (SAC) 268 Battalion te pen CNA/CNF te makai-in Chin Alliance pawlte tawh va kap uh cih thu CNDF pan thugenpipa tungtawn in kizasawn hi.
” Tuni zingsang tung (01:00am – 02:00am) sung CNA /CNF makai-in va kikap thei ung. Ko lam pan bang mah thuzakna omlo ahih manin, thukician kizalo hi. Ko, lam pan KKG galkap khat si ung” ci-in CNDF pan thugenpi Salai Cung Ngai in genkhia hi. Tua banah zingsang pan sun lam 12:00 dong Ukna buluh (SAC)te Khah Lah Yah (268) battalion te’ lam pan 120 MM; 80 MM; 40 MM; thaupite tawh khuaneute lam nasiatak kap uh a, Suntla khuaneu sungah kia in naupang 1 akihel mi 3 in liamna ngah uh ci hi. Liamna ngah mi 3te lakah kum 10 apha tanu neu khat a lu liam in, kum 18 pha tapa khat pen a nungzang liam a, kum 40 apha a Nu pen a khe liam cih thu CNDF thugenpa in pulak hi.
Tua banah tuni zingsang 11:00am hun in zong Falam khuapi huam, Falam -Hakha mawtaw lampi tung a om Ramthlo khuaneu pen SAC te’n vanleng tawh bomb khiat uh a, numei 4 leh pasal 3 vekpi gawm mi 7 liam uh a, lauhuai lua sam lo uh cih kiza hi. Hih bomb khiatna hangin Ramtlo khua sung a om Biakinn khat leh inn pawl khat sia dikdek ci hi. Liamna baina ngah bangzah lian kicianzo nailo ahih manin, Tongsan Media in kikansan laitak in a hun zui-in hong kizasak zel ding cih kiza hi.
Abeisa 2023 April 10 ni in zong Falam township Var gunlei kiang a om SACte’ Police station pen CNDF ten buluh khiazo uh a, tua hangin SAC ten Ramtlo khuaneu leh Wubulah khuapi vanleng tawh bomb khiat uh a, khuami honkhat si-in honkhat mah liam uh hi.
Source: RFA / Khonumtung
Translated: Tongsan Admin Team
Hits: 10