August 11, 2023 || Tongsan Media Group ||
Sagaing Division, Kalaymyo leitaw lam a om Sekan khua sungah Ukna buluh (SAC)te lut uh a, August 11, 2023 ni zingsang lam akipan Thaupi tawh khua sung teng kap uh a, Independent Presyterian Church tungah Thaupi tang kia sukin, biakinn ceiling khempeuh leh a sung lam kongkhak neu mante (glass) kinaksiat mahmah cih thu khua sung miten gen uh hi.
Ukna buluh (SAC) galkapte pen zanni August 10 ni akipan Kalaymyo leitaw lam Indaing-gone khua sungah a lom atangin gal sim dingin kuan uh a, khuami PDF galkapte tawh kimaituah in nasiatak kikap uh a, Ukna buluh (SAC) galkapte 4 si ahih manin, Indaing-gone khua sungah Innte mei tawh banhal uh cih thu khua PDF galkap khatin gen hi. August 11, ni zingsang lamin kikap leuleu uh ahih manin Indaing-gone khuamite taikhia ngam loin khua sungah lau-in awkcip uh cih kiza hi.
“Kalaymyo leitaw lamah ukna buluh (SAC) galkapte’n thakhat thu in lutin galdona nei uh hi. Zanni nitak in langnih kikapna omin, amau SAC galkap lamte lim sih tuak mahmah uh hi. Zannitak akipan in galkap mimal kibehlap uh a, tu zingsang ciangin Sekan khua sungah Thaupi tawh kapin Christian biakinn khat kinaksiat mahmah ” ci-in Sekan khuami khatin gen hi.
Kalaymyo leilu lam a mong pen a om Myo Hla khuami tampitak zong August 11, ni zingsang a kipan Kalaymyo khua sungah taikhia mang uh a, a taikhia theilo a awkcip zong tampi om cih thu Galtai dongtuak huhte Kipawlna pan vaisai khatin gen hi. Tulaitak in Kalaymyo leilu lam huam tengah Ukna buluh (SAC) galkapte leh mipi galkap (PDF) te’ kikal galvai suksia mahmah a, Indai-gone khua ah galphual (Camp) a sat SAC te leh Pyusaw Htee te’n Indaing-gone khua pen mei tawh hal tum cih thu khuasung PDF galkapte’ tung pan kizasawn hi.
Source: People’s Spring
Translated: Tongsan Admin Team
Hits: 6