Gaza City ah zato lian pen ahi Shifa hospital pen Israeli Special Force te’n busim in Hamas te’ selsim galvante akipan lai leh van thupite (Important Evidence) mukhia ta uh cih thu Israel galkapte in November 15, 2023 nitak lamin pulakkhia uh hi. Hih Shifa Hospital pen ni 3 sung akikhakcip khit teh Nov. 15, 2023 ni zingsang lamin, Israel galkapten busim in Zato inn dei (room) khempeuh a neng atawng in sitcianna leh zonna nei uh hi.
Tua bang a etcianna leh zonkhiatna a neih Shifa Hospital sungah natna etna setpi (MRI) Center sung pan a muhkhiat uh galvante leh lai thupi (Important Evidence) te pen International Journalist te kaikhawm in, kiciantak a lahkhia banah Video zong tawh Israel galkapten khahkhia uh hi. Tua a muhkhiatna uh tawh kizui-in, Shifa hospital pen Hamas gal phualpi (Hamas military headquarters) in akizatna thu kiciantak kitheikhia ta ci-in, Israel galkapten gen hi.
Shifa Hospital lei nuai ah akilam / akibawl Hamas te’ galvan selna / galphualpi (Hamas military Headquarters) a kimuhkhiat mang nading in, Zato huang sung a om Inndei (room department) khempeuh a neng atawng in, kiciantak zonkhiatna neih lai ding Israel galkapte’n genkhia hi. Hamas pawlte in bel Shifa Hospital lei nuai ah amau galphual (Military Headquarters) omlo ahih banah Hospital sungah galvan om takpi ahih leh zong amau (Hamas) te neihsa hi loin, Israel galkapte’n abawl tawm / zuau phuak uh hi ci-in, dawng kik uh hi.
Hits: 6