National League for Democracy (NLD) a phuankhia khat ahi နာယကကြီး Thura U Tin Oo (Kum 99) in June 1, 2024 zingsang (8:50AM hunin leitung nusia ci-in a tapa U Thant Zin Oo in pulakkhia hi. Kawl ngeina bangin ni nga khit June 5, 2024 (Wednesday) ni-in kivui ding, ci-in gen hi. ” Tuni zingsang (08:50AM) hun-in hong nusia hi-in, ni 5 sung koih ding cih hiven June 5, 2024 ni (Wednesday) ah vui ding um ing. Amah ahih leh a nuntak lai-in gam le nam ading a pilna, siamna leh veiina tawh a sihni dong mah kipumpiak khat hi-in, a nase / vaipuak a zo taktak hi, cih gennuam ing. A innkuanpihte in sih vui ngeina bangin vui dingin ngaihsun ung.”
General Thura U Tin Oo (Kum 99) in abeisa hun sawt simsim akipan pum langkhat zaw natna tawh dam Yangon Zatopi emergency khan-ah akibawl den ahi hi. General Thura U Tin Oo pen Myanmar military Junta ukna (Dictatorship) langpang in Democracy ngahna ding leh mihing suahtakna (Human Rights) nasepna-ah a minthang vangvang တပ်မတော် ကာကွယ်ရေးဦးစီးချုပ် ဗိုလ်ချုပ်ကြီး lui khat ahi hi.
NLD Party a kiphuat cil akipan Daw Aung San Suu Kyi tawh khut kilenin makaipi ahi hi. Myanmar galkap sungah ကာကွယ်ရေး ဦးစီးချုပ် ဗိုလ်ချုပ်ကြီး dinmun ciang dong ngah bek tham loin, Myanmar gamah Democracy kikhel zawhna ding a veii luatna tawh a kum tam khit ciang dong khawl het loin, a sepna hangin Myanmar gambup mi tampi’ zahtakna a ngah mahmah gam makai khat ahi hi.
General Thura U Tin Oo pen gamkeek Sente a do တပ်မှူး khat zong ahi hi. 1974 March 8 ni-in ဗိုလ်မှူးကြီး za ngah a, တပ်မတော်ကာကွယ်ရေး ဦးစီးချုပ် sem hi. Kidona-ah hangsan takin a do manin, a sang pen Thura Award minphatna zong ngah lai hi. 1976 March 6 ni-in Myanmar military pan khawl hi. 1988 September 24 ni-in ဗိုလ်မှူးချုပ် lui U Aung Gyi, ဗိုလ်မှူးကြီး lui U Kyi Maung, Retired ဗိုလ်မှူးချုပ် U Aung Swe, Kawlgam thudotpi Daw Aung San Suu Kyi cihte tawh NLD a phuante lakah kihel hi. NLD Chairman kum nih sem banah a sih dongin NLD Party thudotpi (ပါတီနာယက) sem hi. General Thura U Tin Oo a sihin a zi, a ta 1, a tu 1 leh tusawn 1 cih teng nusia hi.
Hits: 2