Myanmar gamah ngongtat galkap mangpipa Min Aung Hlaing in abeisa 2021, February 1, ni-in mipite’ thuneihna a suhkhiat / a buluhna hangin, gambup mipite tawh kilangpanna leh kidona hong kipankhia in, tuni ciang dong kidona khauhpai semsem hi. Hih kidona ah Mualmite bek hi loin, Kawl minamte mahmah zong lungkimlo in, gambuppi kidona (Civil war) a piang hita hi.
Hih Myanmar gam buaina ah Kawlgam sunga om minam tuamtuam in Thau tawi-in Min Aung Hlaing langpan/ kap huanin a omna sungah Chin State sung pan minam kee tuamtuamte leh Zomite zong Zomi Federal Union (ZFU) min pua-in, Thautawi kipawlna PDF Zoland min tawh mapanna kinei hi. Zogam sung ahi Tedim, Tonzang, Cikha, Khaikam, Kalay-Kabaw Valley huam sung teng vaipuak nei dingin mapang uh ahi hi.
Hih bangin Zomi minpua ZFU (PDF- Zoland) min tawh galdona (Revolution) a kisep ciangin, i Zomi galkap a omsa ahi Zomi Revolutionary Army (Eastern Command) tawh kipawlthei ding himah leh ngaihsutna leh kalsuanzop zia kibatlohna hang tuamtuam tawh mapang khawm theilo mawk uh hi. Tua hangin kitelkhialhna leh kilangpanna om ahih manin, Myanmar Revolution nasepna ah ngaihsut zahin kimazang / kilawhcing zolo dinmun ah kitung hi.
Zomite akimapankhop theihloh ciangin, ZFU (PDF- Zoland) in kipawlpih /belpawl (Alliance) kisam uh ahih manin, ngaihsutna leh kalsuanzia kibatpih Thau tawi kipawlna honkhat tawh Chin Brotherhood Alliance minin, kibelpawlna nei thei uh hi. Hih kipawlna pen minam leh biakna vai hilo-in, galdona vai tawh kisai kipawlna bek cih kiza hi.
Tua hi a, hih bangin Revolution hunah Ukna buluh ngongtat (SAC), Min Aung Hlaing pawlte tawh kikap/ kidona cihte a hunhun in kinei a, abeisa May 27, 2024 ni akipan Tedim khuapi ah kikap/ kidona kipan hi. PDF Zoland leh apawlte in SAC galphual mun 2 lakhiazo uh a, SAC galkap 9 hingmat banah galvan honkhat zong ngah beh uh hi.
SAC lamte in Tedim khuapi sungah Inn hoih, a lianpite Datsi buakin ban hal uh ahih manin, inn 50 val vuut leh vai suak hi. Tedim khua mite a tawm pen 6000 valin Inn leh lo nusia in, galtai mang uh cih kiza hi. Hih galtai mipite huhna dingin gamsung gampua pan Zomi kipawlna leh biakna kipawlna tuamtuam in huhna kipiaciat hi.
Tua bang kawmkal ah Malaysia Zomite in zong Galtaite huhna leh panpihna dingin Zomi Concert, Kualalumpur min tawh June 3, 2024 nitak in FGA, Kuchai Lama, Hall ah sumbul zonna Lasak pawipi khat thupitak nei uh ci hi. Tua laiah India leh Myanmar gam pan lasa siamte ahi; Lia Zen Ngaih Sang, Lia Cing Ngaih Lian, Lia Mang Nun Mawi cihte leh Myanmar gam pan Lia Huamnu, Lia Kopnu, Tg. Thasing, Tg. Khensan, Tg. David Kim st, Tg. Suum Mung Tungzang, Tg. Kiithang, Pa. Suummuan, Pa Sawbua Mung, Sia JK Kam cihte in zai ziahziah cih kiza hi.
Hits: 5