Indaw Township, Mawlu khuapi lakna ah All Myanmar Students Democratic Front (ABSDF) leh SAC pawl nasiatak kido uh a, SAC galkap leh Police kigawm 14 si-in, galvan nam tuamtuam tampitak zong ngah khia cih thu All Myanmar Students Democratic Front (ABSDF) te in pulakkhia uh hi. Tua banah SAC galkap 7 hingmat uh a, Police Station zong haltum uh hi. Mipi galkap PDF lam pan galkap 2 in gam leh lei ading a nuntakna a piakkhiat banah 1 in liamna ngah ci hi.
Galvan matte pen Thau lawng 21, Tang guk alengthei Thau (revolver) namte lawng 1, landmines mal 5, khutlot bomb tang 24, G-3 Thautang 3000 val, MA tang 300 val, 9 MM tang 200 val, buangnai (rubber) thautang 30, Thautang bawm namkim 50 val, Computer 1, Phone 2, kihona set (Communication device) 1, cihte ngah uh hi. Gal kido laitak in SAC galkapte honkhat taimang uh ci hi.
SAC galkapte leh Police te kipawl a omna Camp khat bek a omna Mawlu khuapi Police Camp pen All Myanmar Students Democratic Fornt (ABSDF), Kachin Independent Army (KIA) leh PDF kipawl khawmte in zanni December 14, ni zingsang lamin busim in lakhiazo uh hi. SAC langpang galdo pawlte in Sagaing Division sung a om Kawlin, Khampat, Shwe Pyi Aye cihte khuapi 3 busim in lakhia khin banah Mawlu khuapi zong zanni December 14 ni-in lakhiazo leuleu uh hi.
Hits: 5