November 8, 2023 || Tongsan Media Group ||
Sagaing Region, Homalin Township, Hlua Sin Gone Camp kikapna ah SAC galkap leh Shanni National Army (SNA) kipawlkhawmte’ lam pan Captain 1 leh nautang kigawm 20 kim si uh a, PDF lamte zong 1 si cih kiza hi. Monywa – Homalin Pyi Taung Suh lampi tungah SAC te’ phualsatna Luah Sin Gone Camp pen Khanti District, battalion 1, makaihna tawh abeisa November 2, 2023 ni-in kidona kipan uh a, November 4, ni in Camp sutkhia zo uh hi. November 8, ni-in Camp ki-ukcip / kilencipzo taktak ta ci-in, PDF galkap khatin genkhia hi.
” Hih LUah Sin Gone Camp pen SAC leh Shanni National Army (SNA)te’ phualsatna khopna mun hi-in, Camp huang dalna limtak bawl uh ahih manin, nakpi tak do ngekngek kul mawk hi. Amau (SAC) lam pan 20 val si uh. Zato a puak uh zong om tham” ci-in gen hi. A site’ sung pan Captain leh adang 5 te Galphual (Camp) mual tungah kivui uh a, adang 15 teng bel Uruh gunpi sungah Naung Po Aung gunlei tung pan khia suk ci-in, khuamite’n gen uh hi.
” Ulian (Officer) te bel limtak vui uh a, a nuai siah nautangte Naung Po Aung gunlei tung pan Gunti sungah khiasuk uh hi. A site tawh kisai a pulakkhiat noploh manin, misi luang selcip in ki-ummawh” cih thu khuami khatin genkhia hi. Kikapna sungah PDF galkap 1 si cih kiza hi. Tulaitak Luah Sin galphual pen PDF te in ukcip / luahzo ta uh a, Satkaya Camp pen busimsan laitak uh hi. Kikapna pen Khamti District battalion 1, Hluah PDF-124, Hluah PDF Thunder Team, CDM Police kipawlkhawm tengin nasiatak do khawm uh cih kiza hi.
Kikapna mun teng ahi; Naung Po Aung – Hluah Sin Gone – Aung Pin Highway, Naung Po Aung – Upper Autaw – Khon Than lampi dung teng pen tulaitak lian kuamah in zuilo / pailoh phot dingin Hluah PDF -124 ten genkhia hi. Tua banah Naung Po Aung District sung a om Hluah Sin Gone khuaneu ah tatsat loin kikapna khauhpai lai ahih manin, khuamite gal kikapna hunah kidop ciat ding leh zaksaknate limtak zuih ciat dingin zaksakna nei uh hi.
Hits: 3