November 8, 2023 || Tongsan Media Group ||
KIA, PDF leh ABSDF teng kipawl khawmin Sagaing Region, Pinlebu khuapi a om ukna buluh (SAC)te’ galphual pen November 7, 2023 nitak lam (5;00pm) hun pawl akipan busim in, lakhiazo bek tham loin, Pinlebu khuapi bup ukcip ta uh cih kiza hi. Kikap hun sungin SAC galkap hon khatin Dialkang (White Flag) lak in, a galvante tawh kipumpiak uh cih PDF galkap ten gen uh hi.
Khuapi sungah Phone line khempeuh susia in, khuapi bup mun thupi teng lakhia / ukcipzo uh cih Lei lam PDF galkapte’ tung pan kizasawn hi. ” Phone line teng kikhakcip ahih manin, kizopna ding haksa hi. Icon bek tawh kizomthei sam hi. Zannitak akipan SAC galkap pawl khatin Thau khia uh hi. Khuapi bel kilazo cih theih hita. A sawt loin khuapibup kilazo in teh “ ci-in genkhia uh hi.
NUG – National Unity Government, Union Minister Dr Tu Hkawng in zong ama Facebook page ah ” Pinlebu khuapi kikemcing zota” ci-in gelhkhia hi. Abeisa 2022 kumin Pinlebu khuapi pen Revolutionary Army (PDF) ten lakhia khin uh a, kepcip zawhna ding haksatna om lai ahih manin, a nungkik san khuapi ahi hi. Pinlebu khuapi pen a khuabup akilakzawh leh Sagaing Region ah kalkhat sungin akilakhia khuapi 3 na hita ding hi.
Hits: 2