November 8, 2023 || Tongsan Media Group ||
Sagaing Division, Tamu Township, Kalay – Tamu lampi khen Man Hmaw khuaneu a om ukna buluh (SAC) khutzat Pyu Saw Htee galphual pen November 6, 2023 nitak lam (2:00pm) hun pawlin, Tamu Township PDF te’n busim in sutkhia zo uh ahihna thu battalion 4, pan thunei khatin genkhia hi.
November 6, 2023 nitak lam (2:00pm) kim pawlin SAC galkap 17 kim omna Tamu township, Man Hmaw khuaneu a om Pyu Saw Htee galphual pen Tamu Township People’s Defense Force (TT-PDF) 4th Battalion pawlin thakhat in Mawtaw tawh Camp busim uh a, Pyu Saw Htee khempeuh taimang uh hi. Tua Pyu Saw Htee Camp pen Kalay – Tamu lampi tung a om Pan Tha khuaneu leh Tamu khuapi kikal ah om hi-in, Pan Tha khuaneu tawh kizom ahi hi. Camp busimna ah SAC galkapte a si, aliam om leh omlo cih kithei cian nailo cih kiza hi.
“Camp ki-ek nusiat khin a, ko pawlin kibuluak / sutkhia zota ung. Ko, pawlin Mawtaw tawh lut suakin kap tawh ka thuah pah ziahziah uh hi. Amau lam pan hong kap loin, amau pawl bel bang mahmah kiging manlo uh ahih manin, a Mawtaw uh tawh sidek liang in taimang uh hi. A si aliam bel om / omlo cih kithei nailo phot hi. Gal huh cih bang zong omlo lai hi” ci-in Tamu Township PDF Battalion 4, pan thunei khatin genkhia hi.
Tuni Nov. 8, ni-in, Tamu Township, Khampat khuapi zongah SAC leh PDF kipawl khawmte nasiatak kikap uh a, SAC galkapte’n Camp nusia in sidek liangin taimang uh ahih manin, PDF kipawl khawmte’n SAC Camp sutkhia zo uh cih kiza hi.
Hits: 5