August 20, 2023 || Tongsan Media Group ||
Kawlgambup AG zumpi (General Council of the Assembly of God of Myanmar) te’ makaihna tawh Kalaymyo pansan in Pasian’ nasem Pastor te Siampi Zaa (Ordination / Reverend) piakna pen August 12, 2023 (Saturday) Am.8:00 hunin Taungphilar A G Biakinn, Kalaymyo ah thupitakin nei uh ci hi. Tua lai ah General Council (GC) zumpi, Yangon pan Revd. L. Zaw Hang, D.D. (Superintendent. G.C., AG) te nupa; Revd. Dr. Suan Za Pau, D Min. (General Secretary, G.C., AG) leh a zi Revd. Lal Sang Lian (@) Sm. Sangpui leh GC., AG zumpi ngak, Revd. Akhi Zangyaw te kihelthei uh ci hi.
Hih Ordination piakna tawh kisai pen kum thum hal ta a kipia zel hi-in, abeisa March kha sung kipia ding geelna a om hi a, Kawlgam hoih lohna hangin tutung ciangin a kipiathei pan suak ci in Sia Peter Khampu in Tongsan Media ah gen khia hi. Tutung Ordination piakna pen AG gambup a om District tuamtuamte’ sung pan District 3 kigawmin kipia hi-in, District No.4 (Kawlzang teng); D.C. No. 7, (Tedim gam teng) leh D.C. No. 9. (Hakha-Thantlang lam teng) kihel cih kiza hi.
Hih Ordination piakna ah a ngah thei dingte pen a nuai akisam teng tawh kituakte bek kipia ci hi. (1) Exhorter (နိုးဆော်ရဆရာ) kici hunbit Pasian’ nasem hihna neite; (2) Licenced Minister (Exhorter) a ngah khit kum thum a cing khinte; (Gtn: Baptist lamte’ zatdan ah (M.C) ngahsate. (3) Licenced Minister ngah zawh kum nga khit teh hih Ordination kisiau / kipia thei pan ci hi. Tua hi-in tutung Ordination kipiakna ah D.C-4 pan Pastor 54; D.C-7 pan Pastor 19 leh D.C-9 pan Pastor 13; a vekpi gawm Pastor 78 te Ordination kipia in, mimal kiheltheilo zong om lai ci hi.
Tua banah hih Ordination kipia dingte pen akipiak ni ding August 11, 2023 ni-in Phualpi A.G Biakinn, Kalaymyo ah thusinna leh thudotna (Interview) na limtakin neihpih masa uh a, Pawlpi in nek-le-dawn limtakin vaak uh ci hi. Tua banah Ordination piak ni-in zong Taungphilar innteek Pawlpi in an lim mahmah tawh vaak zihziah cih thu kiza hi.
Thupuak:
Peter Khampu (C Media, Kalay)
Hits: 9