August 18, 2023 | Tongsan Media Group |
Chin State, Tedim khuapi ah zanni August 17, 2023 nitak khua mial khit (10:00pm) hun akipan zingsang lam (02:00am) kim ciang dong kikapna omlo pi in, Ukna buluh (SAC) galkapte’n Thaupi leh thauneu phial lot uh a, Myoma veng sung a om Inn pawl khat Thautang in kha in kisiagawp cih khuamite’n gen uh hi.
“Zan nitak khua mial khit akipan Thaupi leh thauneu tatsat loin ging ziahziah hi. Kei zakna ah Inn 4, 5 peuh mah sukha hi. Tu ciangciang mi a si aliam bel kiza nailo hi. Innte bel ahih leh Sikkang, kong khakneu man (window glass),te leh Tuikholna bungpi (Water Tank) akipan Um leh bel hon khat thautang khak om hi” ci-in, khuami khatin gen hi.
Myoma veng a om Cope Memorial Baptist Church (CMBC) biakinn huan sungah akitam nailo Thaupi tang khat kia ci hi. Tedim khua sungah hih bang a nitak khuamial lakah Thaupi, thauneu tawh kikapna a omna hang bulpi kitheizo nailo hi cih thu khuamiten gen uh hi. August 16, 2023 ni-in Tedim khuapi a om Ukna buluh (SAC) nuai a om District General Manager pa’ Mawtaw Double Cap a khawl laitak Thau tawi pawk khatin Hawlin paikhiatpih mang cih kiza hi.
” Tedim khuapi a om Construction Avenue ah a Mawtaw a koih hi-in, Mawtaw cingte zong om uh hiveh aw! Tua ni pen Phungzi sang pai mang uh hi. Tua laitak Mawtaw pen suaktatak hawl khia hiathiat ve uh aw! Tua Mawtaw pen a nung pan mipiten zong kizui ngam paklo lai hi” ci-in Tedim khuami khatin gen hi.
Tua khitteh ukna buluh (SAC)te in nitak lam ciangin a Thaute uh phial lot gawp uh ci hi. Tua tawh kizom in abeisa ni 2, 3 lai akipan Tedim khuapi ah Zato neipa Mawtaw khat zong Thau tawi kipawlna khatin Matsak / lakkhiat sak ziau cih kiza hi.
Source: People’s Spring
Translated: Tongsan Admin Team
Hits: 17