Sagaing Division, Kawlin khuapi kikapna ah mipi galkap kipawlkhawmte in Kawlin khuapi a om Myanmar Economics Bank pan Dangka MMK. Awn 900 val ngah khia uh cih thu National Unity Government in November 14 ni-in pulak khia hi. Tua sumte pen National Unity Government neihsa ahi, Interim Central Bank in sazian ciamtehna kiciantak bawl pahin, sumkoih mipite in supna leh baina a omhet lohna dingin vaihawm sak ding cih thu NUG – Finance Minister U Min Zay Yar Oo in genkhia hi.
“Ko, (NUG) in bittak leh kiciantak in kem dingin vaihawmna nei khin ung. Sazian sitte akipan akisam department teng tawh a munah pai in, limtak encian hi ung! Mimal neihsa bank (Private Bank) te zong kepcing zia ding ahi sitset (System) tuamtuam kinei hi. Galdona phual (Ground) a omte’ sumkep zia (Systematic Operation Plan) danin kikem hi” ci-in NUG in genbeh hi.
Sagaing Division leulu lam a om Kawlin khuapi pen Kachin Indepence Army (KIA), People’s Defense Force (PDF) leh Kawlin PDF te kipawlkhawm tengin, abeisa ni 4 sung nasiatak kikapna a neih khit uh November 6 ni-in Kawlin khuapi lakhia zo uh ahi hi. Ukna buluh (SAC) galphual satna munte ahi; မြန်မာ့စီးပွားရေးဘဏ် (Myanmar Economics Bank), မြေစာရင်းရုံး (Land Registry Office), အထက်တန်းကျောင်း (Kawlin Tansawm – BEHS sanginn ), ရဲစခန်း (Police Station), leh ထွေအုပ်ရုံး (General Administration Department office) mun teng nuaizial masa uh a, tua khitteh Kawlin khuapibup lakhia in Sgaiang Division sungah District khuapi a kila khia masa pen hipah hi. Tua mun pan galvan Thau nam tuamtuam vekpi gawm lawng (54) ngah khia in, thauvui, thautang zong tampitak kingah khia ci-in, NUG, Ministry of Defense in tangko khia uh hi.
Kawlin khuapi lak khiat khit ciangin mipi galkap KIA leh PDF galkap pawlin ngak suak pah uh a, khua mite zong bit tak leh lung muanhuai takin kepbitna nei uh hi. SAC in zong Kawlin khuapi lak kik zawhna ding nasiatak hanciam uh a, Kanbalu leh Wunthu khuapi pan Pyusawthe leh SAC galkapte pawlkhat khah khia-uh a, nisim langnih kikapna om den bek tham loin, SAC pawlin van lam tawh nasiatak khiat ngekngek uh ci hi.
Hits: 10