Shan State, Lauk Kai khuapi ah phualsat SAC galkap Khah Mah Yah (129) pan galkap mimal 126 te pen abeisa November 12, 2023 (Sunday) ni in, battalion buppi leh a innkuanpihte ciat tawh Galvan khia in, kipumpiak (Surrender) uh cih thu Northern Alliance galkapte’n November 14, 2023 ni-in pulakkhia uh hi.
Hih Lauk Kai khuapi a om Regional Command (Dah Kah Sah) pan Major Kyaw Ye Aung makaih battalion pan galkap 126 leh amau innkuanpih mimal 134, a vekpi gawm 261 teng pen Kokang galkap MNDAA, Rakhin galkap (AA) leh Ta’ang galkap (TNLA) te kipawlna ahi Northern Alliance te tawh kizom in, a galvante uh nusia /khia in kipumpiak (Surrender) uh cih thusuahna ah genbeh hi.
SAC galkap Khah Mah Yah (129) te pen Kokang region (1), Shi Shan Region, Man Hlaw Village tengah phualsat a om battalion te ahi hi. Hih galvan tawh akipumpiak SAC galkapte pen mi khat MMK. 1000000/- leh innkuante mi khat ciangin MMK. 100000/- ciat huhna piakhia uh hi.
” 1027 Operation” galsimna nei Northern Alliance pawlte in SAC khut nuai a om Palikte leh galkapte zong Thau khia in a kipumpiak ciatna ding un Hanthawn in zaksakna nei uh a, amau nuntakna lauhuaina omlo bek tham loin, mihing vaang leh lim, galkap khat ii vaang leh limte sukha lo dingin vaipuak laksakna ding ci-in kamciam pia uh hi.
Thau tawh akipumpiakte kua mahmah bawlsialo in, mat leh vuakna cihte peuh mah omlo dingin Northern Alliance ten gen uh hi. Amau meltheih innkuanpihte tawh amanlang theithei in akimukik theihna ding zong vaihawmsak ding ci-in Northern Alliance pawlin genkhia uh hi.
Hits: 10