Kokang galkap (MNDAA) in Kokang Region buppi kilakhia kik zota ci-in, MNDAA in tuni January 6, 2024 ni-in tangko khia uh a, Tangthu in hong piak vaipuakte MNTJP leh MNDAA te’n kizo ta ci-in, MNDAA te’n pulak uh hi. Hih bang a gualzawhna pen MNTJP Party member te, Kokang Alliance army Officer te in kiptak hun sawtpi tak Revolutionary galdona sungah lutna tawh sepkhiat dingin genkhia hi. Tua banah Special region (1), bek tham loin Kawlgam sung a om bawlsiatna thuak Mualmi nam tuamtuamte’ gualzawhna mah hi ci-in pulakkhia hi.
January 4, 2024 ni-in Laukkai khuapi a om (Dah Kah Sah) Commander akipan Brigadier Generals 6 leh galkap nautang vekpi 4000 valte’n galvan khia in Kokang Region sungah a om lai SAC galphualpi khat ahi Nan Tin Min Taung camp ah phualsat a omte’n galvan khia uh in kipumpiak uh hi. Tua bangin Galvan a khiat khit nungah Kokang Region buppi kilakhia kik zota ci-in tangko khia uh hi. Tulaitak Kokang Region buppi ah SAC galkap khat zong om nawnlo dinmun hita ci-in gen khia hi.
Kokang Region, Laukkai khuapi sungah MNDAA galkapte lutin kikap sungin SAC Dah Kah Sah Headquraters a om galkapte in MNDAA leh galphual kipuahna ding vai kikupna a neih khit ciangun, thukimna (Command agreement) nei uh a, January 4, nitak (4:00pm) hunin Laukkai Dah Kah Sah ah phualsat galkapte leh a innkuanpihte Inn lam ciahsak dingin vaihawm sak uh cih kiza hi. January 5, 2024 sun laitak in Kokang Nan Tin Ming Taung Camp a om SAC galkapte zong MNDAA te kiangah Galvan khia in, kipumpiak uh cih pulak hi.
Abeisa kum 14 sung tawntung SAC galkapten Kokang Region sungah (2009 August 8) lungphona / kibuaina piang sak uh a, Khamtheih zatang leh galvan zonkhiatna (Drugs and weapons inspection) cih paulap in, Special Region (1), Kokang area pen Thalun galvan tha tawh busim in do uh cih pulakna nei uh hi. Tua bangin a busim khit nungah Kokang Mualmi Ki-ukna tuam (ethnic self-governing power) pen zawh thawh thu tawh sutkhia uh ci hi.
MNDAA in galkap vai tawh kisai paizia (military maneuvers) zui in mun leh phual kituahkhia uh a, Special Region (1) leh Thuneihna ngah kikna (restoring autonomy) ding ngimna tawh Galvai, gamvai kikupna cihte akipan lampite tawh Revolutionary nasep kipankik in, Kum (14) sung a hanciamna uh tawh tuni hunah a sangpen Gualzawhna laimai thak leh Tangthu thak akipulak kik ahihna pulak uh hi.
Tulaitak MNDAA in Mongko leh Kokang Distrcit nihte busim in luahkik uh a, Mupan (Thein Ni) leh Kut Khaing sungah mun tamzaw tham Ukcipzo bek tham loin, Hopan Region teng zong ngah kik uh cih kiza hi.
Hits: 0