Chin State, Matupi township, Matupi – Hakha lampi tung a om District Office ah galkap tha akibehlap thak uh ukna buluh (SAC) galkapte leh CDF – Matupi te October 27, 2023 nitak lam (4:00pm) hunin kikap tuah uh a, SAC galkapte 1 sipah in, a tawm pen 5 liam uh a, CDF- Matupi te a si aliam omlo in nung kik thei uh cih thu CDF – Matupi in tuni October 28 ni-in pulakkhia uh hi.
Matupi District zumpi ah bel galkap thak behlap zel uh a, ko, CDF – Matupi lam panin battalion-2 ten zong kikep / kidalna lam (Security) nasiatak kigingden ung ci hi. “SAC galkapte galkap tha a behlapsan laitak uh hi-in, Beuha mual (Strategy land) munah Security panla pha mahmah ven, District zumpi ah galkap nasiatak koih den uh” ci-in CDF- Matupi (Battalion-2) pan vaisaipi khatin genkhia hi.
Tua banah “ SAC zumpi Kawlgam thuk lam pan galkap Mawtaw 80 val tawh Matupi lam hong kahto uh a, Matupi Township ah Security nasiatak nei uh ahih manin, ko CDF- Matupi lam pan zong nakpitak Security neih kul hi” ci-in genbeh hi. Abeisa October 6, 2023 ni zongin Matupi – Hakha kikal Lampi tung a om District zumpi ah SAC galkapte leh CDF- Matupi te nasiatak kikap uh a, SAC lam pan 2 si uh cih kiza hi.
Hits: 11