Northern Alliance kici Arakan Army (AA), Myanmar National Democratic Alliance Army (MNDAA) or Kokang leh Ta’ang National Liberation Army (TNLA) kipawl khawmte in ” Operation of 1027″ cih min tawh Northern Shan State sung a om SAC galphualte pen October 27, 2023 ni buluh / sim kipan uh a, October 28 ni teh ninih kizom sung bekbek in, SAC galphual a lian leh aneu vekpi gawm 40 val lakhia zo uh hi. Tua kikap/ kidona ah SAC galkapte 100 val kaplum uh a, 10 val hingmat uh hi. Tua banah Thautang dalna Mawtawpi 2 leh galvan namkim alom atang ngah beh uh cih thu Northern Alliance thukizakna zumpiten pulak khia hi.
Chin Shwe Haw khuapi kim a om SACte’ galphual khempeuh lakhin uh a, limtak kemcip zo uh hi. October 28 ni sun (12:30pm) hun pawlin Myanmar National Democratic Alliance Army (MNDAA) te in Mong koe (မုံးကိုး) gam huam Hpawng sai (ဖောင်းဆိုင်) khua kiang kikapna pan gualzawhna ngah uh a, SACte’ thautang dal Mawtaw 2 ngah khia uh hi. Adiak in SAC galkapte’ galphual thupi mahmah khat ahi Makya Tih Pauk Pauk (မာကျားတိပေါက်ပေါက်) kici mualtung a om Galphualpi zong busim in lakhia zo lai uh ci hi.
Hih bangin SAC galkapte’ galphualte a zawh gawpna hangin SAC galkapte leh palikte in, a galvan tawite tawh amanlang in, ki-ap / kipumpiak (Surrender) dingin (MNDAA / MNTJP) te’n October 28 ni-in thusuahna (Statement) nei uh hi. Ukna buluh (SAC) ii khut nuai-ah nasem Department tuamtuamte in amau nasepna tawh kisai van khempeuh limtak a kepbit nading a, suksiatna a neih leh nasiatak thubawlna kinei ding cih thute zong kihel hi. Sawmlo pi a, siatna khat peuhpeuh a om khak leh gal kidona a veen hun ciangin, vai phuak a zawh lohna tawh thusitna kinei ding cih thute kihel hi.
Tua banah mawhna khialhna khat peuh tawh mat ding thupuak simna a ngah galkapte pen a kinai pihte in thu a zaksak nading, mawhna nei mi hutna, sel simna, taimangna dingin huhna a piate zong nasia takin thu kibawl ding cih thute kihel hi. ‘Gal kikapna sung pan akihing mat galkapte pen limtak kep ding’ cih thukhun tawh kizui-in, kikem kikhoi ding bek tham loin, gal kikapna pan aliam abaite zong zatui zaha tawh limtak bawlin, akisam annek tuidawn te piak dingin thusuahna sungah kihel hi. Tua teh SAC galkapte sung pan galhiam tawh taikhia in akipumpiak (Surrender) te zong limtak kep ding cihte kihellai hi.
Tua banah Kokang leitang tung a om SAC galkapte, palikte leh nasepna khen (department) tuamtuam pan SAC khut nuai ah nasem khempeuh in amau khensatna tawh a lutte lungdam takin kisang dinga, MNDAA in lungsim picing takin vaihawmna leh thukhenna kinei ding ci hi.
———————————————————————————————
Northern Shan State ah Kokang galkap (MNDAA) te in “Operation of 1027” min tawh ni 3 sungin ukna buluh (SAC) galkapte’ phualpi 57 busim in lakhiazo bek tham loin, galvan nam kim ngaihsut zawhloh zahin alom atang ngahkhia uh:
Shan State (Northern) sungah ” Operation of 1027″ min tawh Kokang galkap (MNDAA) galkapte in, ni 3 sungin ukna buluh (SAC) galkapte’ phualpi 57 busim in lakhiazo bek tham loin, galvan nam kim ngaihsut zawhloh zahin alom atang ngahkhia uh cih thu MNDAA thuneiten pulak khia hi.
Myanmar National Democratic Alliance Army (MNDAA) tuni October 29, 2023 ni zingsang (11:00am) hun ciangciang Kokang, Mong Koe, Lashio, Mupan, Namsalat cih munte a om Ukna buluh (SAC) galkapte’ galphual kigawm 11 pen busim in lakhia uh a, galkap 10 hingmat uh hi. Tulaitak ciangciang a lakkhiatsa SAC te’ galphual vekpi gawm 57 pha ta cih pulakna nei uh hi.
Mong Koe Area:
Kokang galkap (MNDAA) in Mong Koe District, Manyang region sung a om SACte’ galphualte busim uh a, October 28, nitak lamin galphual No.1, No. 2, No. 3, mun 3 teng lakhia zo uh hi. Tuni October 29, zingsang lamin galphual No, 4, No, 5, No, 6 teng lakhia leuleu uh hi. Tulaitak a Mong Koe District Manyang region a om SACte’ galphual om khempeuh MNDAA te in lakhia siang ta uh cih kiza hi.
Tuni October 29, ni zingsang (10:25am) hunin MNDAA ten Mong Koe District, Kuam Thang Pauk Pauk mual tawh kimaingat a om Mualtung a om SAC galphual khat busim in lakhiazo uh hi.
Lashio Township:
Tuni October 29, zingsang (4:40am) – (6:40am) kikal MNDAA te in Lashio nisuahna lam a om Kum Yong Pauk Pauk mual tung a om SAC te’ galphual 2 busim in, Drone a dal/ a nawngkaisak thei setvan pawl khat leh galvan pawl khat lakhia bek tham loin, SAC galkapte 4 hingmat uh cih kiza hi.
Tua banah tuni Oct. 29 zingsang (9:45am) hunin MNDAA ten Hmu Pan Police Station busim in lakhiazo a, Pistol lawng 4 leh galvan lompi khat zong ngah khia uh hi. Zingsang (9:10am) hun pawlin SAC galkapte’ Man Chin Naw galphual lakkhiat sak uh a, sumtang (MMK. Teng 200) val leh adang van tampi ngahkhia uh cih kiza hi.
Kokang Region:
MNDAA in Tong Shan Area, Yan Thet Shan mual tung a om SACte’ galphual busim in lakhia zo uh a, tatsat loin ninih kizom kikap/ kidona hangin hih galphual teng a lakhiazo uh ahi hi. MNDAA te khauhpai semsem uh ahih manin, galphual a om SAC galkapte in a galkap puante suahkhia in, mi mawkmawk puan tawh Galphual pan taikhia mang uh a, tuate sung pan 8 mang zo banah misi luang 7 muhbeh uh cih kiza hi.
Tua banah tuni Oct. 29, (10:15am) hunin MNDAA in Rakohkai khua nitumna lam mualtung a om SAC galphual busim in lakhia zo uh hi. A nung ciang thukizakna ah SAC galkap Sah Kah Khah-16 te’ zum nasem makaipi (Chief Staff) pa Kokang galkap MNDAA te tawh kikapna sungah si cih kiza hi.
Hits: 12