August 10, 2023 || Tongsan Media Group ||
India gam Mizoram state ah galtai a om Kawlgam mite suakta tak om theih nading ngimna tawh gammi hi cih ciapteh lahna (Identification Card) bawl theihna ding cih paulap in India kumpi in (Biometric) kici mihing pumpi etcianna khat bawl kipan ta cih thu Kawlgam galtaite tung pan kiza hi. Hih Biometric bawlna / lakna pen abeisa July 2023 kha pan hi-in, mai September kha ciang dong lakna kineito lai ding ci hi.
“Hih Boimetrict cih pen mittang leh khutpi, khutmee te Computer tawh zaihin sittelna ahi hi. Khutpi mekna (finger print) hong nei sakin ka thu ka late uh zong kiciantak hong cianteh sak hi. Galtai numei naupang akipan nial theih loin hong laksak uh hi. Hih Biometric lakna tawh kisai in meltheih khat genna-ah Biometric lak khit ciangin ID card hong bawl sak ding ci hi. Tua banah India gam sungah suaktatak om thei / teeng thei ding hi. A sawt loin UN Card danin kizangthei ding ” ci-in Lawngtlai district a om galtaite vai nasem makai khat in gen hi.
Tua banah Manipur State pan Mizoram State ah gambel singtang mite akituam theih nading leh bawltawm ID card a nei Kawlgam galtaite akisapna zui in akimat theihna dingin India kumpi in hih (Biometric) akikaikhawm uh hi ci-in pawlkhat in gen leuleu uh ci hi. Mizoram State sungah galtaite giah phual a tamzaw-ah Biometric lakna kinei a, giah phual pawl khat te’n Biometric bawl ding deihlo / nial uh cih kigen hi. “Ahi zongin mi tamna galtaite giah phualte-ah kilazo a, Bangladesh pan galtai Samon minamte’ giah phual leh Lunglei galtaite giah phual-te ah kilathei lo hi. Tua banah Aizawl leh khuapi tuamtuam a omte kiang zongah kilatheilo hi” ci-in Kawlgam pan galtaite thu abuai pih nasem khatin gen beh hi.
Biometric lakna-ah khutpi mek, maitang lim, mittang sittelna, DNA profile, kampau et cianna le a dang khempeuh kihel ci hi. Kawlgam galtaite kiang Biometric lakna tawh kisai India for Myanmar in nasia takin nial uh a, manlang takin akikhawlna ding abeisa July 30 ni-in thusuahna bawl khin uh hi. Galtai Kawlgammite thuman lo a Biometric bawlna pen mimal suahtakna (human right) a susia nasep na leh mimal khat ciat ii kibatlohna lim leh mel (or) gamtat luhek zia tawh kisai set siamnate zangin mimal deidanna nam khat hi ci- in nasiatak nialna / langpanna kinei cih thute tawh a thusuahna sungah kihel ci hi. Tua mah bangin Kawlgam ah ukna buhluh (SAC) pawl in State and Division pawl khatah Biometric lakna nei uh a, Mihing suahtakna (Human Rights) lamah a mapangte kikal ah kikamtamna leh ki nialna piang sak cih kiza hi.
Source: Ayeyarwaddy Times
Translated: Tongsan Admin Team
Hits: 3