August 10, 2023 || Tongsan Media Group ||
Rakhine state, Sittwe khuapi kiang Bengal Tuipi tungah mi 55 tawh Malaysia gam lam zuan ding akithawi Rohingyate’ Tawbaw khat pen abeisa August 7, 2023 ni-in Huihpi khauhpaina hangin kibung (tuipi sungah tum) ahih manin, tuni August 10, 2023 ni ciangciang a si kimusa vekpi 17 pha ta cih thu khuamite’n gen uh hi. A dang 30 valte mangcip lai uh ahih manin, tui siamte leh hotkhiatna nasemten zonsan uh cih thu Sittwe khua pansan Shwe Yaung Metta Foundation pan makaiten gen uh hi.
” Tuni ciang misi luang 17 kimukhia ta in, Sittwe zatopi ah kipuak hi. A kimuzo nailote zong tuzing sang tung akipan kizong san hi.” Hih Gunkuang tung ah mi 55 a tuang hi in, abeisa August 7, ni-in Rakhine State, Yatih Taung Township pan Malaysia gamah a zinkhia ahi hi.
Tua ni mahin Gunkuang kibung / tum hi a, numei nih a luang tui-in lamto in, pasal 8 te pen a nungta in Sittwe khuapi Basara khuaneu , Tuipi gei ah khuamiten mukhia uh hi. Tua banah adang misi luangte pen Bida khua, Teechaung, Dapaing khua Gunpiau tengah kimukhia cih khuamiten gen uh hi.
A nungta sa a suakta pasal 8 te ahih leh Sittwe khuapi Police station ah Palikte leh galkapte’n sam uh ci hi. Rohingya te pen Rakhine gamah nasem theihna kipialo banah annek tuidawn akipan haksatna hangin, hih bangin nuntakna luang kham in, Malaysia gamah a paikhia uh cih thu Rohingya miten gen uh hi.
Source: RFA News
Translated: Tongsan Admin Team
Hits: 5