September 10, 2023 || Tongsan Media Group ||
Morocco gamah Zinlinna hangin misi vekpi nai / minutes asim sungin kibehlapto zel a, tuni September 10, ni zingsang lam ciang 2000 val sikhin ta ci hi. Septe,ber 8, ni-in Morocco gam laizang tang khua mahmah khat ahi Marrakesh khuapi ah mualdungpi khat pansan in, 6.8 Magnitude tha tawh zinling hi. Zinlin kipatcil lamin mi 300 kim bek si cih akizak khit nai 24 sungin a zahnih khangto ziau hi. Tua mah bangin liamna ngah zong 2000 kim omin, tuate’ sungah 1400 kimte dinmun muan huailo ah om ci hi.
Morocco Kumpipa King VI Mohammed in gambuppi dahna hunin ni 3 sung ciamteh in tangkokhia a, gam dialkhai a lang ciang bek khaisak hi. Kumpipa in zinlinna hanga dongtuak inn le lo neilote omna ding puanbuk, annek tuidawn leh adang kisam tuamtuamte huh dingin gam kumpi thuneite zasak hi. Zinling hualpi khitteh hualneu kihallo in ling kik zelzel ahih manin, mipite inn sungah lut sak loin, zannih kizom Lampi tungah omcip sak hi. Marrakesh khuapi pan leitaw lam teng pen zinling khauhpaina mun ahih manin, mi tamsi penna zong hipah hi.
Marrakesh khualui lam zongah inn pawl khat kicim in, a neng atawng in kicimsiang sitset in siacip hi. Zinlinnan pen Marrakesh khuapi nitumna leitaw lam Km. 71 kigamlatna bulphuh in ling hi a, Haietlek mualdung tung bulphuh in leithuk zinlinna nam ahih manin, leitang tung lam kisiatna nasia pha diak ci hi.
Hih zinlinna pen Morcco gamah abeisa 1960 kum khit misi a tampen zinlinna hi dingin kilamen hi. Abeisa 1960 kum zinlin lai-in, Agada khuapi kiangah 6.7 Magnitude tha tawh hi in, misi vekpi 12000 val si ci hi. Marrakesh khuapi gei a zinlingna pen Morocco gamah kum 100 val khit ah a khauhpai pen dingin kiciamteh ci hi.
Source: People’s Spring
Translated: Tongsan Admin. Team
Hits: 8