Galvai tawh abuai Myanmar gam leh leitung gam tuamtuamte’ ading in Francis Pope in deihsak thungetna nei hi. “Myanmar, Ukraine, Israel leh Palestine gamte ah galvai tawh buaina leh kibawlsiatnate a manlang in akhawl theihna dingin makaite langnih maitang kimu aa, thukikupna, kilemkikna a om theihna ding veiina tawh thungetsak ding mangngilh kei un” ci in Roman Catholic makaipi Pope Francis in Vatican biakinnpi pan abeisa June 1, 2024 (Sunday) ni in mipite tungah hanthotna nei hi.
Gal kidona hang aa sihna, siatna leh supna a thuak Myanmar, Africa, Middle East leh Ukraine gamte ah kilemna a omna dingin Pope in pulakkhia hi. Africa-Sudan gamah Rapid Support Force (RSF) a kici galkap paramilitary khatin kilemna om theihna dingin maitang kimu in, thu kikupna neih ding a kamciam uh pen Galkapte in a nialna hangin, kidona khauhpai semsem ahih manin, tua bang kidonate a manlang a veen theihna ding Pope Francis in ngetna nei ahi hi.
Sudan gamah abeisa 2023 kumin kiteelna (election) nei uh a, tua a man khit ciangin kumpi thak kilaih ding vai ah kithutuak lohna om hi. Tua akipan Sudan galkap kumpite leh mipi galkapte (Rapid Support Force (RSF) te kikal ah kidona kipankhia hi. Tua kidona hangin mi tul tampi in sihlawh bek tham loin mipi million 9 bangin inn leh lo nusia in galtai uh hi. Sudan gamah naupang million 3.6 bangin tha omna ding nek-leh-dawn (Vitamin) kisam uh a, million 18 kimin annek tuidawn ding neilo uh hi ci-in UN High Commissioner of Human Rights ah makaipi ahi Volker Turk in pulakkhia hi.
Hits: 4