Rakhine State, Minpya Township a om SAC galkap batallion khempeuh busim in, lakhia mangzo uh cih Rakhine galkap (AA) thugenpi U Khine Tuh Khah in genkhia hi. Minpya, Kyaukdaw leh Myauk Oo khuapite ah SAC battallion teng AA in a busimna tawh kisai thudotna tungtawn in U Khine Tuh Khah in tuni (February 6) nitak lamin genkhiatna nei hi.
“Minpya khuapi a om SAC battalion khempeuh ko, Rakhine galkap (AA) in lakhia in ukcipzo ta ung. Mun leh mual etcikna / etcianna kinei toto lai hi. Thudang tuamtuamte bel a sawt loin hong tangko khia toto lai nung” ci-in U Khine Tuh Khah in gen hi.
Minpya khuapi ah SAC galkap a om lai pawl ahi No. 379 Infantry battalion (Khah Mah Zah-379) pan Commander akipan SAC galkapte leh innkuanpih a zalom asim in Galvan khia uh a, Rakhine galkap (AA) te’n February 5, ni-in SAC galphual khempeuh a vekpi in lakhia ta cih thu Tualsung Media lamten gen hi. “Gal vai tawh kisai thu omziate kipulak kuan ding hi. Battalion buppi Galvan nusia uh cih pen 100% aman / adik hi.” ci-in AA te tawh kinai Media sem khatin genkhia hi.
Minpya khuapi ah Khah Mah Yah (380), Khah Mah Yah (541) cihte om khin-in, Khah Mah Yah (380) te pen Rakhine galkap (AA) ten January 28, ni-in lakhiazo ta hi. Khah Mah Yah (541) zong abeisa ni 2, 3 sung mahin lakhia uh a, Khah Mah Yah(379) te Febraury 5, 2024 ni in lakhia zo leuleu cih Tualsung galvai thuthak semten gen uh hi. Ahi zongin AA in Khah Mah Yah (541), lakhiazo cih pulakna nei kik nailo hi. “Commander in galval nusia / khia hiphot hi. Minpya battalion pen AA in akhakcip sawt ta hi. Zolo ding cih thei ahih manin, Galvan khia cih thu hihtuak pen mai ” ci-in khuamite’n gen uh hi.
Minpya khuapi pan SAC galkapte’ Infantry battalion 3 teng pen No (9) Operational Command Headquarters (Sah Kah Khah-9) nuai ah om hi. Sah Kah Khah (9), Division ah makaipi pen Brigadier General Aung Aung ahi hi. Tua manin Minpya khuapi a om SAC battalion 3 teng pen AA pawlin lakhiazo mang uh a, Minpya khuapi ah SAC galphual kici limlim khat zong om nawnlo ci-in, khuamite’n gen uh hi.
Rakhine State a om Sah Kah Khah (9) khut nuai ah Battalion 10 om hi. AA in Minpya pan Khah Mah Yah 379, Khah Mah Yah (541) a lakhiat zawh battalion 8 lakhiazo uh a, Kyauk Daw khuapi a om Khah Mah Yah (375) leh Myauk Oo khuapi a om Kah Mah Yah (377) battalion nih bek om lai ci hi.
Rakhine galkap (AA) pen mun leh mual kizom ahi Minpya leh Myauk Oo township pan SAC battalion teng pen 1027 Operation akipat abeisa 2023 November kha pek akipan khaktan in, nasiatak do ngekngek uh hi. Tua khuapi 2 a om SAC zum innte pen November kha pekin akihong om nailo in, SAC battalion munte ah va busa uh hi.
AA in SAC battalion headquarters, Camp phualte a banban in a lakkhiat laitak ahi hi. Myauk Oo khuapi pan Khah Mah Yah (378) pen February 5 ni ahi a, Khah Mah Yah (540) battalion pen January 30 ni cihte ah AA in lakhia uh hi. Tua manin tulaitak Myauk Oo khuapi ah Khah Mah Yah (377) leh Police station (31) bek om lai hi. Khah Mah Yah(377) pen Thaupi tawh mipite’ teenna lam kap thapai uh cih thu khuamite’n gen hi.
Tua bang mahin Kyauk Daw khuapi zongah Khah Mah Yah (374) leh Khah Mah Yah (376) pen AA in lakhia khin ta hi. Tua hi a, Kyauk Daw khuapi ah AA pawlte’n a laksawm Kah Mah Yah (375) bek a buppi ngah khiat zawhna ding om lai bek cih thu Northern Alliance thum te in February 5 nitak lamin pulakkhia uh hi.
Myauk Oo, Minpya leh Kyauk Daw township ah SAC galkap te’n a supmai ding 100% bang akiciansa Camp pawl khat lakkhiat zawhna ding Rakhine army (AA) pan tatsat loin kikap ziahziah uh cih thu Three brotherhood Alliance in february 4, ni-in tangkona nei hi.
Tua banah Bangladesh – Rakhine gamgi, Maung Taw khuapi a om Taung Pyu (Right and Left) Camp nihte AA pawlin nasiatak sim gawp uh a, Taung pyu (Right) battalion pen February 4, 2024 ni-in a vekpi lakhiazo uh a, a om lai Taung Pyu (Left) Camp zong tuni February 6, 2024 ni-in lakhiazo leuleu cih khuami thuthak saite’n genkhia uh hi.
Hits: 2