September 16, 2023 || Tongsan Media Group ||
Ukna buluh (SAC)te’ sungah mi muanhuai Ulian 2 te sumvai tawh kisai buaina hangin thusit/ thudotna nei dingin kiman uh cih kiza hi. Thusit dingin akiman Ulian nihte pen galkap lamah panmun lianpen (Commander in Chief) Lieutenant General Moe Myint Tun leh Union Cabinet Minister U Soe Thut te hi uh a, Inn thongkia (House Arrested) in kikoih laitak cih SAC zumpi lamte tawh kinaihuai te’ tung pan kizasawn hi.
SAC in hih bangin amatte’ sung pan tui galkap lam makaipi Admiral Mo Aung tawh akibang in Ulian pawl khat zong kihel lai ci hi. SAC in Lt. Gen. Soe Thut pen Home Affair Minsiter panmun pan Union Minister panmun ah a laih khit akipan tu a bangin thusitna anei uh ahi hi. “Union Minister Lt. Gen. U Soe Thut pen damlohna tawh zato khuan (permit) kipia hi cih tawh a inn ah Inn thongkia (house arrested) in koih uh ahi hi. Thukizakna ah bel Dollar zuakna vai leh a ma mimal sumbawl sumzuakna tawh kisai in, khiatna laite hang cih kiza a, tua akikhiatna laite zong SAC makaipipa in sim khin ta hi” ci-in SAC zumpi tawh kinaihuai Ulian khatin genkhia ci hi.
Lt. Gen. Soe Thut pen Gilzangpi Cancer natna hangin, a thupi mahmah Home Affair Ministry department pan Union Minister panmun ah kilaih cih tawh paulap akineih hangin, ataktak ah ama Business tawh kisai kikhiatna hangin, akitawlnga sak ahihna kitheikhia hi. Lt. General Mo Myint Tun pen galkap lamah alianpen (Commander-in-Chief of Defense) panmun akikoihna galkap mangpipa tawh kinaihuai banah a mi muan mahmah khat hi-in, gamsung ah vanlut / van pusuahna lam leh dollar vai tawh kisai-in kiman a, thusitna kinei hi cih kiza hi.
SAC makaipipa ii mimuan Lt. Gen. Mo Myint Tun pen a thupi muhkhiat theih ding lawhcinna bang mahmah sepkhiatna nei loin, hun tomno sungin SAC makaipipa in thubawna leh panmun thupi a ngahkhia zo khat ahi hi. Hih bangin man leh hen, thusitna a thuakna hangin galkap Ulian dangte’ sung zong lunghimawhna leh launa om ta cih kiza hi.
SAC in sumbawl mihaute pen manin, thusitna a neih khitteh tua sumbawlna sungah panmun thupi anei galkap Uliante zong manin, thusitna anei zel uh cih thu gen uh ci hi. SAC makaipipa ii mi muan Lt. Gen. te akimatna bulpi pen US Dollar khekna vai ah sumkhek zia thukhunte thuman tak a zuihlohna hang thu cih kiza hi.
Source: Ayeyarwaddy Times
Translated: Tongsan Admin Team
Hits: 12