September 16, 2023 || Tongsan Media Group ||
Thailand – Myanmar gamgi KNU te’ thuneihna Dupalaya District, Kaw Krait Township sung mun khat a om Ukna buluh (SAC) te’ galphual khat ahi Ye Tha Siauh galphual (Camp) pen Karen National Liberation Army (KNLA), Battalion (18) leh PDF kipawlkhawm (Revolutionary Joint Force) te’n September 14, 2023 zingsang lamin va busim uh a, SAC galkapte 9 si-in, galkap dangte taimang bek tham loin, a galvan nam tuamtuam 12 leh thautang tampi ngahkhia uh hi. KNLA leh PDF kipawlkhawmte’ lam pan 1 si-in, 3 liam uh cih thu KNU, Dupalaya District pan Sept. 16, 2023 ni-in pulakkhia uh hi.
SAC galkapte’ galphual pan akingah galvante pen; MA-1 lawng (1), MA – 2 namte lawng (2), MA-3 namte lawng (1), MA-4 thauka lawng (2), RPG -7 lawng (1), 60mm Thau tom lawng (2), Pistol (2), Ngasapi Mei lawng (1), leh thatang akipan adang van nam tuamtuamte pen RPG-7 tangte tang (70), 82mm tangte (40), 60mm tangte (110), M-79 tangte (40), 5.56 tangte (2800), 7.62 tangte (800), Galdona Mines tang (20), landmine pum (23), Galmai akikoih mines te pum (3), Kizopna setpi (Large Communication device)te (1), gamlim (map) dal 1, Khutlot bomb (20), leh Compass (2) cih teng ahi hi.
Kikap /kidona pen nisim phialin om den a, SAC galkapte lam pan a si aliam tampi om khin banah galphual (Camp) sung a om SAC galkapte leh amau Innkuanpihte zong alungsim lam thanem / lungkia mahmah ta ci hi. Tua banah zawhthawh thu tawh ki-uk SAC galkapte pen a galphual uh pan taikhia mangin, KNU leh PDF kipawlkhawmte’ kiang lamah alut / akipawl tampi om khin ta cih thu KNL ten genkhia uh hi.
Source: People’s Spring
Translated: Tongsan Admin Team
Hits: 4