Sagaing Rigion, Kalay Township, Zomi Inn 1000 kim teenna Pyidawtha khua-ah abeisa March kha akipan Ukna sut (SAC) galkapte leh Kalay PDF te’ makaih a kipawlpih PDF group 5 kimte tawh nasiatak kikaptuahna om hi. PDFs pawlin Pyidawtha khua pansan / phualpi in nei uh ahih manin, SAC lamte’n a hawlkhiat zawh nading thauneu bek zang nawn loin, Thaupi leh Drone zangin nasiatak do ngekngek uh ci hi.
Tua bangin Nipi kaal khat sung sun leh zan cih omlo in nasiatak kikap/ kidotuah uh hi mah leh Gal van zat thauvui thautang kikimlo / kikhaih luatna hangin, PDFs kipawl khawmte’n haksa sa mahmah in, nungkik phot uh ci hi. SAC lamte’n mai nawt zaw tawh kibang uh a, Pyidawtha khua sung lutin luah khia zo dinmun ah om ta ahih manin, April 19, 2024 ni akipan khuamite lau in, inn leh lo nusia in galtai uh ci hi.
Galtaite’ nusiat inn sungah ban lutin van manphate leh ganta ganno cihte a lakkhiat khit uh ciangin, Innte a banban in hal sak ziahziah uh a, tuni ciangciang Inn 500 val bang haltum khin in, tuate lakah biakinn zong hon khat kihelkhin ta ci hi. Nisim phial in Inn hal behbeh lai uh ci hi. Galtai zong mimal 5000 kim pha ta in, Zozaang, Zonuamzaang, Kimlai, Mualzaang, Singialzaang Khualui leh khuathak, Tanzaang, Zoheisa, Laisuanglui, Dimzaang, Sialthawzaang, Sawbuayeshin leh Tahan- Kalaymyo cih khua 15 ah kimah galtai uh cih kiza hi.
Pyidawtha galtaite huhna leh panpihna tawh kisai ah Kawlpi dung suk a om biakna kipawlna NGO khat ahi Catholic Karuna Social Servicee leh pawlpi tuamtuam leh innkuan pawl khatin amau hih zawh zahzah huhna pia ci hi. Pyidawtha khua kikapna ah SAC galkapte pen Karen State, Hpa An khuapi ah phualsat Batalion 22, pawlte hi in, Thaupi leh Drone limzat mahmah uh ci hi.
Kikapna tawh kisai ahih leh kitawlnga nai lo a, tuni May 16, 2024 ni ciangciang Pyidawtha leh Thayagone khua kikal tengah nasiatak kikap ziahziah lai uh ahih manin, kikapna bang hunah khawl ding cih akipan a zo alel kithei cihte kigen theilo suak phot ci hi.
Thupuak: Zoheisa pu (Pyidawtha)
Hits: 3