Sagaing Division, Tamu District, Tamu township sung a om Khampat khuapi pen November 7, 2023 ni zingsang lamin khuabup lakhiazo taktak ta cih thu NUG, Ministry of Defense (MoD) pan PDF galkap zumpi in pulakkhia uh hi. Kachin Independence Army (KIA) galkap mangpi Chief General Khawng Loon in Military Region Commander asepna No. (1) Military Region, Tamu District Command makai-in, KIA, PDF, Militia Peoples Defense kipawlkhawm tengin Khampat khuapi busim in, lakhia zo cih kiza hi.
Hih PDF kipawlkhawm teng pen Tamu District battalion 2, Military Region Special Battalion 2, No. 1 Military Area Weapon Group, Frontline command group, CNDF, TDA, RCDF leh KNA-Burma cih teng kipawl khawm uh ahi hi. Khampat khuapi pen Kalay – Tamu Asia Highway tungah om hi a, abeisa November 3, ni akipan KIA leh PDF kipawl khawmte’n umcih in kikap thapai uh a, tuni November 7, zingsang lamin khuapibup lungkim huai takin lakhia zo taktak ta uh ci hi.
No. 1, Military region in C3C te’ geelna tawh KIA galkap mangpa in Military region commander semin, KIA Officer te in District Commander cih danin vaipuak sem ciat uh a, PDF battalion te leh Peoples Militatia group te’n naitak a galvenna cih bangin, panmun leh vaipuak nei ciat uh ci hi. Kikapna tawh kisai a neng atawng a hun zui-in kitangkoto zel ding ci hi.
November 3, ni in KIA makaih galsimna tawh Sagaing Division ah mun tampi hunkhat sungin busimna nei uh a, SAC galphualte, Police station cihte lakhia zo uh hi. Kawlin khuapi zong zanni Nov. 6 ni busim in kilakhia zo a, Khampat khuapi pen tuni Nov. 7, ni-in kilakhia leuleu ahi hi. 2014 kum Kawlgambup milip simna sazian tawh kizui-in, Khampat khuapi pen Khuapi khen bekin kiciamteh hi a, mi vekpi 38000 val teng uh hi. Veng 5 in kikhen a, khuaneu 8 tawh kilamkhawm khuapi khat ahi hi.
Khampat khuapi pen Tai 12 kimvel in zai a, Pilsinna sang Tansawm (BEHS) sang, Tangiat sang leh Tanli (SPS) sangte om hi. Cina lupna 25 a om Zato khat om a, a tamzaw Chin minamte’ tenna khuapi khat cih thu abeisa 2017 kum Tamu Township General Administration Department in a ciamtehna tungtawn in kimukhia hi. Three brothers Alliance makaih ” 1027 Operation” min tawh abeisa October 27, 2023 ni akipan kikap / kidona ah Ukna buluh (SAC) galphual 100 val kilakhia khin in, tatsat loin kila toto laitak ahi hi.
Hits: 8