July 27, 2023 || Tongsan Media Group ||
Sagaing Division, Tamu khuapi, Sandra Gone veng ah July 25, 2023 nitak lamin Tan 8 sangnaupang khat akihel Innkuan khatah mi 3 , a teenna inn sungah kithatlum cih thu khua sung mite’ tung pan kiza hi. Asite pen kum (15) kim Tangiat sangnaupang Mg. Pih Shiang, a sanggamnu Ma Nyeing Nyeing (Kum 20), leh a pianna Nu uh Daw Aye (Kum 50)te ahi hi.
Hih Innkuan kithatte pen Tamu khuapi, Sandra Gone veng a teenna inn sungah ah om laitak nitak lamin Ukna buluh (SAC)te’ mizat Pyue Saw Htee pawl khat a inn sungah lutin, Innkuan mi 3 te thau tawh kaplum in, a awmpi leh a lutang cihte thautang in kha ci-in, a meltheihte in gen uh hi.
” Daw Aye pen India gam Moreh lamah sumbawl / vanzuak hi-in, a innkuan sung nuntakna lem mahmah khat hi. A nasepna tawh kisai Pyue Saw Htee te’ tungah sumgolh pia den hi. Tua nitak ciangin Pyue Saw Htee te tawh kamkinialna nei ” cih thu khuami khatin gen hi. Hih Innkuan nuta site pen Sing nasep tawh nuntak zong uh hi-in, Ukna buluh (SAC)te’ sawltak Pyue Saw Htee te’n amau tung pan sumgolh piak ding vai tawh Inn sungah lutin a kaplum uh cih khuamiten ummawh leh genkhia uh hi.
Tamu khuapi Sandra Gone veng a om hih nuta 3 te pen PDF /ABSDF kipawl khawm mi 7 a inn sungah lutin Thau tawh akaplum danin Ukna buluh (SAC) te’n genin zuau thu thangsak uh hi. PDF te’ thah hi cih thukician lakkhiat theihna omlo pi-in, ukna buluh (SAC)ten zuah thugen khia uh ci hi. Tamu khuapi sungah Ukna buluh (SAC)te leh a mizat Pyue Saw Htee te ngongtat den uh a, abeisa 2022 kum sungin India gammite akipan khuami honkhat Pyue Saw Htee ten thatlum uh hi.
Tulaitak Tamu Township, Khampat khuapi ah Ukna buluh (Sac)te leh mipi galkap (PDF) bel pawlte ni 5 sung kizom kikap uh a, July 22, 2023 ni-in Khampat khua sungah mipite’ tenna inn sung Thaupi tawh kap uh ahih manin, khuami Tangval khatin sihlawh hi. Tua banah July 25, 2023 ni-in zong Khampat khuapi kim a om Khampat, Kanan, Bohkan, Tengkaza, Pantha, Nankhauh khuate ah Ukna buluh (SAC) galkapten Thaupi tawh kap bek tham loin, galvanleng tawh a kapna hangin khuami 10000 val inn le nusia in Kalatmyo- Tahan leh India gam lamah galtai uh cih kiza hi.
Source: Burma Media Consortium
Translated: Tongsan Media Admin Team
Hits: 7