Chin State (Zogam), Tedim gam huam Tedim – Kalaymyo lampi Thuamvum mual dawn (Kenedy Peak) a om Ukna buluh ngongtat (SAC) galkap 30 kimte omna galphual pen November 21, 2023 ni zingsang (04:00am) hunin PDF-Zoland in busim uh a, nai 2 sung kikapna a neih khitteh SAC Camp kilakhia / kisutkhiazo cih thu PDF-Zoland makai khatin genkhia hi. Thuamvum kikapna-ah ukna buluh ngongtat (SAC) galkap 5 si-in, 1 hing mat uh a, atam zaw tai kek mang uh ci hi. PDF – Zoland lam panin galkap Tg. Kam Lian Pau in gam leh nam ading a nuntakna piakhia cih thu PDF – Zoland pan thusuahna nei uh hi.
Galvan tawh kisai-in Thaupi 40mm namte akipan thauvui thautang tampi ngah khia banah Thumvum mual dawn SAC pawlte’ Camp munah PDF -Zoland Dialkhai (flag) kikhai ta hi ci-in PDF – Zoland makaipa in genbeh hi. Kikap / kidozawh a sawtlo sun lam (12:00pm) hun pawlin Kalaymyo lam pan SAC pawlin galhuh Mi-35 vanleng khat tawh Thuamvum mual vialkhat kimkot in akap gawp khit uh teh kilehkik pah ci hi.
” Thuamvum (Kenedy Peak) mual dawn a om ukna buluh ngongtat (SAC) Camp pen mipite’ khut sung tung taktak ta hi. Ahi zongin a thu omzia akicing takin kitheician zo nailo hi” ci-in PDF – Zoland pan makai khatin genkhia hi. Thuamvum mual (Kenedy peak) pen Chin State (Zogam) ah mualsang pen hi in, ukna buluh ngongtat (SAC) pawlin gam ukna a suhkhiat khit akipan Thuammual ah galphual satin om pan uh cih thu kiza hi.
Hits: 12