August 29, 2023 || Tongsan Media Group ||

Chin State, Tonzang khuapi, Khualai Guazang veng ateng Evangelical Baptist Church- EBC pawlpi Sia khat pen Zomi Revolutionary Army (ZRA) te’n August 29, 2023 ni zingsang (10:00am) hunin tum gawp / sat gawp uh cih thu khuamiten gen hi. Zanni sun hun pawlin khua sung vak kawikawi a om ZRA galkapte pen Pastor pa in, Phone tawh man (Photo) zaih in, gamdang a mel theihte kiangah khak sawnin, tua akhakna ah Ukna buluh (SAC)galkapte tawh kipawl hi ci-in, Social Media tungah a khahkhiatna hangin, ZRA ten Pastor pa sat gawp uh hi ci-in, Tonzang khuami khatin genkhia hi.

Pastor pa pen ama inn mai ah ZRA galkapte’n a nungzang anhuanna singkhuah tawh sat gawp uh a, nasa lua in kah ziahziah kawmin a thumthum hangin, Thau ngatin sat leuleu uh ahih manin, Siapa a lutang leh a nungzang dupin liamma ngah cih kiza hi. Tua banah ama vanzuakna sai mai a om vanlei khat zong ZRA galkapte’n thu om lopi-in, sat gawp uh ci hi. “Pastor pa bel zato kipuak hi. Ahi zongin nak liam lua sam kei. Hih bang a Pasian nasem Pastor khat a sat gawp uh pen kilawm hetlo hi” ci-in, Tonzang khuami khatin gen hi.

Hih thu piang tawh kisai Tonzang township Public Administration te’n August 28, ni-in mawhsakna thu pulakkhia uh a, ZRA te’n mipite’ simmawhna tawh otgawpna, ngongtat in satgawp / tupgawpnate, thumanlopi a bawlsiatna, zawhthawh thu tawh mi kaihkhopna, sum mawk ngetnate akipan ngongtat nasepnate a sep nawnlohna ding Tonzang Township Public Administration te’n thuhilhna nei uh ci hi.

Abeisa August kha lai a piang Tonzang khua sung a om Palik zumpi akikap khit akipan tuni ciang dong Ukna buluh (SAC) galkapte leh Palikte a pua pial ngam nawnlo uh a, amau omna Len (Camp) sung bekah omcip uh hi. Tusung teng ZRA galkapten khua sungah kilehsuk kilehto in Security sem uh cih kiza hi.

Source: Khonumthung News

Translated: Tongsan Admin Team

Hits: 10

Byadmin

Leave a Reply

Your email address will not be published. Required fields are marked *