India Central Government in Myanmar – India gamnih kikal suaktatak kikawmna / kizopna “Free Movement Regime – FMR” pen khaktan ding cih thukhensatna a neihna uh tawh kisai-in, Mizoram kumpi leh ipite thukimloh / deihlo uh ahih manin, May 16, 2024 ni (11:00Am) hunin Zo Re-Unification Organisation (ZORO) Headquarters makaihna tawh India – Myanmar gamgi zul a om Zokhawthar khua-ah gamdai hit hiat lungphona (Peaceful Rally) nasiatak nei cih kiza hi.
Tua lungphona hunah Mizoram, Champhai leh Aizawl lam pan mipi 1000 val leh Myanmar gam lam pan zong mipi 100 asim mah kihelthei ci hi. Lungphona hangin India thuneite’n kizopna Gunlei leh Gate te khak phot uh hi. Gamnih kikawmna gamgi suakta tak kantan theihna kikhaktan mawk leh adiakdiak pan Myanmar pan India gamah galtaite omna, khawlna ding haksatna leh buaina om pah ding hi ci-in, Myanmar gam pan galtaite a panpih kipawlnate in gen uh hi.
Myanmar gam buaina / kidona hangin India gamah Myanmar gammi Galtai vekpi 60000 val om ta uh ci-in, galtaite ahuh pawl in mimal sazian ciamtehna tungtawn in genkhia hi. Lungphona nei mipite in akikona-ah, ” Hih Free Movement Regime -FMR pen deihlo hi ung! Gamnih sungah ateng Zomi (Chin) minamte pen a kikhen thei ngiatlo Tuun sung khat piang Unau laizom vive ka hi uh hi” cih laimalte gelhin mipite’n kikona nei uh hi.
Gamgi khaktan / umcip ding geelna pen India Minister in abeisa February 6 ni-in a pulaksa hi a, suakta takin lut/pusuah theihna “Free Movement Regime – FMR” zong khak pah ding India Central Government in a geel laitak ahi hi.
Hits: 3